Qaartartumeerinerup kingorna Bulgariamut takornariat allamut ingerlanneqarput
Bulgariami pinerliiniarluni qaartartumeerisoqarnerata kingorna kalaallinut qallunaanullu takornarianut sivisunerulaartumik angalanissaaq taamaallaat akornutaassaaq
Danmarkimi nunanut allanut ministereqarfimmit naalagaaffeqatigiinni innuttaassuseqartut Bulgariamut angalanissamik nangaasaarneqartinnagit tamanna kalaallinut qallunaanullu feeriartarfimmut nuannarineqaqisumut angalanissamik pisisimasunut imaaliallaannaq sunniuteqassanngilaq, naak pingasunngormat mittarfimmi Burgasimi imminut toqunniarluni qaartartumeerinermik eqqugaagaluartoq.
Maannakkulli mittarfik piffissami aalajangigaanngitsumi matuneqarallarsimatillugu takornariat pineqartut mittarfinnut allanut ingerlanneqassapput, Star Toursimi tuniniaanermi pisortaq Stig Elling nalunaarpoq.
Mittarfimmi Burgasimi Sunny Beachimit 30 kilometerit missaanni kujasinnerusumi nalinginnaasumik ulapaarfiusaqisumi minnissamut taarsiullugu takornariat Varnamut ingerlanneqassapput, Sortehavetip eqqaani feeriartarfimmit nuannerineqaqisumit 90 kilomaterinik avannarpasinnerusumi.
- Akunnernik marlunnik sivisunerusumik bussertoqartussaassaaq, feeriarnissarli ulorianartorsiortinneqanngilaq, taamaallaallu mittarfimmiittariaqarpoq angalanissamut uppernarsaat naapertorlugu.
- Nunanut allanut ministereqarfiup ilitsersuutai malippavut, aammalu Bulgariami oqartussaasut qanimut attaveqarfigalutigik, Stig Elling oqarpoq.
Kalaalialuit sumiiffimmi tassaniipput
Maannakkut qallunaat 5.000 missaanniittut Bulgariami aasaq manna takornariarfinnaami feeriarput.
Sermitisaq.AG-mit paasivarput kalaalialuit eqqissiviilliorfiup qanittuaniittut.
Aasap ingerlanerani Sortehavetip seqinnerajoqisup eqqaani naalagaaffeqatigiinniit takornariat 40.000-t missaanniittut angalassapput.
- Taqqavani takornariat sms-erfigaavut pisut malinnaavigalutigik ilisimatillugit, pisarnermisulli feeriarssapput, kisianni ilaquttaminnut attaveqaquagut ajoratik nalunaarutigalugu.
- Takornariarpassuarnit nalunaarfigeqqinneqanngilagut, tamannalu ima paasivarput ajortoqarsimanngitsoq, oqarpoq.
Imminut toqunniarluni qaartartumeerinermi Israelimiit takornarianut tunngatinneqartumi inuit arfineq pingasut ajunaarput 30-llu sinnerlugit ikilerneqarlutik.
Sermitsiaq.AG.mit attaveqarfigerusuppatsigit Bulgariami eqqissiviilliorfiup eqqaani feeriaruit. Nittartakkamik aaqqissuisoq attaveqarfigineqarsinnaavoq redaktion@sermitsiaq.ag atorlugu oqarasuaatikkullu 38 39 56