- Naammagittartariaqarpugut
Borgmester Hermann Berthelsen oqarpoq Kangerlussuarmi pissutsit eqqarsaatigalugit naammagittartariaqartugut
- Eqqissisimavugut suliassallu suliarineqarnissaanut piffissaq atorneqartussaq atorneqartariaqarpoq. Uagut naammagittartariaqarpugut arlaannarpulluunniit angakkuarsinnaanngimmat.
Taamak oqarpoq borgmester Hermann Berthelsen, Qeqqata Kommunia, Kangerlussuarmi pisut pillugit Sermitsiaq.AG'mut oqaaseqaateqarnermini.
- Neriuutigaarput sapaatip akunnerata ingerlanerani ikaartarfimmut iluarsiissutissap inaalinnissaa. Tamatuma kingorna ikaartarfimmik piusumik eqqarsaatersussaagut. Tamakkua saniatigut Kangerlussuarmut tunngatillugu nutaarsiassaqanngilaq, Hermann Berthelsen oqarpoq ilanngullugu oqaatigaa aalajangiisoqarpat tutsiuteqqikkumaarluni.
Taassuma arfininngornermi nunaqarfik tikippaa ilaatigut naalakkersuisut siulittaasorigallagaat, Jens B. Frederiksen, Demokraatineersoq peqatigalugu.
Tamaani ilaatigut nunaqarfinni aqutsisut peqatigalugit isumaqatigiissutigineqarpoq namminersorlutik oqartussat aamma Mittarfeqarfiit piffissami qaninnermi pilersuineq qulakkiissagaat soorlu piffissaq ungasinnerusoq eqqarsaatigalugu pilersuisinnaasut ataavartut qulakkeerneqarnissaat.
Ippassaq ataasinngornermi suleqatigiit oqaatigaat Kangerlussuarmi pisup kingorna maanna suut tamarmik nakkutigineqaqqissaartut ajunngitsumillu ingerlatsisoqartoq.
Namminersorlutik Oqartussat aamma Mittarfeqarfiit sapaatip akunnerata naanerani ilisimatitsissutigaat Kangerlussuarmi timmisartuussinerit aseruatitertoqarnerata kinguneranik ajoqquserneqarnavianngitsoq. Mittarfeqarfiit innaallagissap erngullu aqqutaanik aserortoqarsinnaaneranut sillimapput.