Pingo Euromanip saqqaani

Kunngissap Frederiup inuunera allanngorluinnarpoq Pingomik taaguuteqarluni sakkutuutut immikkut piginnaasalittut ilinniarnini ilungersunartoq naammassigamiuk, timikkut tarnikkullu piginnaasat kisimik pingaartinneqarlutik.

Taama atuagassiami Euromanimi aggustimi saqqummertussami apersorneqarluni oqaluttuarpoq.

Kunngissap suut tamaasa aqqusaarpai aalajangerlunilu prinsiunini Danmarkimilu kunngissaanini ajuusaarutigiunnaarniarlugu:

- Frømanditut ilinniarneq kiisami naammassigakku eqqarsarpunga: Taamaattoqassanngilaq, ajuusaarnissara eqiagilarpara.

- Pillunga inuit qanoq eqqarsarnersut sivisuallaamik eqqarsaatigisimavara. Kunngip ernerimmanga ajunnginnerusunillu atugassaqarnera ajuusaarutigiunnaarniarpara.

Maannakkut tunuarsimaarunnaarlunga taamaaliorpunga, atuagassiamut oqarpoq.

Ilisarititsineq 14-inik qupperneqartoq
Kunngissaq atuagassiap saqqaaniippoq quppernernilu 14-ini aamma ilisaritinneqarluni.

- Ukiup affaaniit iluitsumut tamatunga kingorna inuit oqarfigisarpaannga inuuserinnerulersimasunga inimullu iseraangama ersarinnerusumik qinngorneqarlunga, aamma sakkutuutut atisaqartinnanga.

- Ilinniarneq taanna inuuninnik allanngortitsivoq. Kiisami allanut assersuussinnaanngorpunga nalunagu asuli tunineqaannarsimananga.

Ilisarititsinermi angut imminut akuerisimasoq takutinneqarpoq, kunngissallu siusinnerusukkut oqaluttuartarnermini oqaatigisarsimavaa Danmarkimi kunngissaanini inuusuttuulluni akueriuminaatsissimagini.

Malunnaateqarusuppoq
Ullumikkut pissutsit akuerisimavai, inuillu naapikkaangamigit malunnaateqarnissani kissaatigaa.

- Inunnik naapitsigaangama malunnaateqartutut eqqaamaneqarusuppunga, atuagassiami apersorneqarluni oqarpoq.

Maajimiit 2011-miit maajimut 2012-imut tusagassiortumik Anne Sofie Kraghimik sisamariarluni oqaloqatigineqarnermini Frederik oqaluttuarpoq meeraalluni angajoqqaami qaninnerunissaat tatigeqatiginissaallu maqaasisarsimallugu.

Aqqanilinnik ukioqarluni paasilerpaa ullut ilaanni kunnginngorumaarluni. Marselisborgimi poorskimi ullup qeqqarsiortillutik dronningip ernini oqaluttuuppaa nukaata Joachimip Schackenborg kingornutissagaa, Frederiullu nuna kingornutissallugu.

Ikiorneqarnissaq tatigeqatigiinnerlu angajoqqaamini pissarsiarinngilai, aanaminili dronning Ingridimi.

Aperineqarami 13-inik ukioqarluni imminut naapittuuguni qanoq oqassanersoq, akivoq:

- Kinaassutsit tulluussimaarutigiuk. Taamanikkut iluamik tamatut oqarfigineqarneq ajorpunga.