Eqqanaraluttuaq! Pitsanngoriarfissaqanngilaq

Ulluni tulliuttuni 7-10-ni sila nalinginnarmit kianneussaaq, DMI-p nunatsinnut silasiortua siulittuivoq. Sermersuarmi kiassuseq ullut pingajussaa rekordiliivoq

Qanittukkut Kangerlussuarmi taamatut isikkoqarpoq, ullunili aggersuni ikaartarfik suli atugarliortinneqarnerussaaq. Ass.: Adam Lyberth

Kangerlussuarmi pinngortitap eqqumiitsuliornersua suli taamaaginnarallarunarpoq. Silap kiannera sapaatip akunnera naallugu taamaaginnarallassaaq, DMI-p nunatsinnut silasiortua oqarpoq.

- Pisimasumik pititsisumim sermersuarmi qanoq pisoqarsimanera suli ilisimaneqanngilaq, kiannerujussuali pinngitsoorani pingaarutilimmik pisooqataasimassaaq. Ajoraluartumilu silap piffissami aggersumi kalaallit ikiorsinnaanngilai, tassa sermersuup qulaani silaannaq naatsorsuutigineqarmat ulluni tulliuttuni 7-10-ni nalinginnarmit kiannerusassasoq, nunatsinnut silasiortartoq Jesper Eriksen dmi.dk-mi allappoq.

Atuaruk "Asserpassuit: Ajunaarnerup aallaavia"

Atuaruk "Erngup suut tamaasa kuuguppai"

Kangerlussuulli eqqaani sermersuaq kisimi kianngilaq. Aamma sermersuarmi pavanerujussuaq kiappoq:

- Kalaallit Nunaata sermersuani nalinginnaasumut sanilliullugu kiattorujussuusimavoq, juulip 11-anni nal. 15 silasiorfimmi Summit-imi UTC-p, sermersuup qaffasinnerpaaffiani 3200 meterit missaanni qaffasitsigisumiittup, uuttorpaa 2,2 gradinik kiattoq, taamatullu qaffasitsigisumi kiaqaaq, pingaartumik eqqarsaatigissagaanni sermip seqernup qinngornerata ilarujussuaq utertittaraa.a

Atuaruk "Kangerlussuarmi videoliat sualuttut"

Aamma sermersuup avannarpasissuani tammaarsimaffimmi NEEM-imi piffissami kingullermi kiannermik rekordiliisoqarsimavoq. Ullumi ullut pingajussaa ingerlatiinnarlugu kiassuseqartarsimavoq, ullumilu nutaamik rekordiliilluni 1,3 gradinik kiassuseqarpoq, tamanna NEEM-ip nittartagaani atuarneqarsinnaavoq.

Powered by Labrador CMS