Kangerlussuarmi pisut ajornerulinngillat
Naalakkersuisut aamma Qeqqata Kommunia Kangerlussuarmi nakkutiginninnerat ingerlalluarpoq ataasinngornermi naliliineq taamak nipeqarpoq
- Qeqqata Kommunia suleqatigalugu Kangerlussuarmi pisut aqussinnaavagut.
Taamak ataasinngornermi ullaakkut oqaluttuarpoq naalakkersuisut siulittaasuata sinniisua Jens B. Frederiksen, Demokraatit.
- Pingaaruteqarpoq eqqaamassallugu kuuk qarsutsisoq eqqartoratsigu, illunut, inissianut ilami mittarfimmut akornusiinngitsoq, Jens B. Frederiksen Sermitsiaq.AG'mut oqarpoq.
Borgmester Herman Berthelsen, Qeqqata Kommunia, aamma Mittarfeqarfiit pisortaanerat, Jens Lauridsen kiisalu suliamik ilinniagallit arlallit peqatigalugit arfininngornermi Kangerlussuarmi misissuivugut.
Tamaani suleqatigiit nunaqarfimmi aqutsisut peqatigiillutik isumaqatigiissutigaat piffissaq qaninnerusoq eqqarsaatigalugu innaallagissamik imermillu pilersuinerup qulakkeerneqarnissaa, soorlu piffissaq ungasinnerusoq eqqarsaatigalugu pilersuisinnaanerup qulakkeerneqarnissaa.
- Tassunga tunngatillugu nutaarsiassaqarpa?
- Naagga, iliusissatsinnik eqqarsaatersuleruttorpugut, Jens B. Frederiksen oqarpoq.
Namminersorlutik oqartussat aamma Mittarfeqarfiit sapaatip akunnerata naanerani oqaatigaat, aserortertoqarnerata kinguneranik Kangerlussuarmut timmisartuussinerit akornuserneqassanngitsut. Mittarfeqarfiit innaallagissamik imermillu pilersuinerup akornuserneqarsinnaanera upalungaarsimaffigigaat.