Anna Tunumi eqqaaniarneqarpoq
Inuk Tunumi kulturitsigut sunniuteqarluartoq toqukkut qimaguppoq, Kommuneqarfik Sermersuumi kulturikkut aaqqissuussisarnerni akisussaasoq oqarpoq
Kommuneqarfik Sermersuumi fritidsinspektøri kulturikkullu akisussaasoq IA-miit Harald Bianco kulturikkut sunniuteqarluartup tivasartullu Anna Kûitse Thastumip toquneranut atatillugu eqqaaniaavoq.
- Anna Kûitse Thastum Tunumi kulturitsigut pisuussutitsinnik ingammik tivanermi qitinnermilu sunniuteqarluartoq maanna toqukkut qimaguppoq. Inuk kulturitsinnik pingaarutilik annaavarput.
Læs også "Anna Kûitse Thastum er død"
- Anna nunaqarfimmini Kulusumi tivanermi kiisalu kalattut qitinnermi tammatsaaliuilluni kisimi pinnani, taamatullu illoqarfitsinni, kitaani nunanilu allani annertuumik ilisimaneqarpoq. Taamaalilluni kulturikkut pingaartitatta ilai Annap eqiinganermigut, nikallujuillunilu suliniartuarnermigut nunatsinnut qujamasunnaqisumik qimatsivigaatigut.
- Annap uia, ernera ilaqutaalu qimagaanerannik misiginneqatigaavut! Annap eqqaaneqarnera ataqqinartuuli, Harald Bianco allappoq.
Anna Kûitse Thastum sivisuumik napparsimareerluni sapaatit akunnerani kingullermi tallimanngornermi toquvoq.
2008-mi namminersornerullutik oqartussat kulturikkut nersornaasiuttagaanik nersornaaserneqarpoq, ukiunilu kingullerni inuunini qilaatersortarnerup UNESCO-p nunarsuarmi eriagisassat allattorsimaffianut ilanngunneqarnissaa suliniutigalugu.