Aleqa: Iliuuseqartoqarli

Politikerit ataatsimiinnissaat Kangerlussuarmi innuttaasut pisariaqartinngilaat, innuttaasut ikiorneqarnissamik pisariaqartitsipput, Siumup siulittaasua oqarpoq

Kangerlussuaq maannakkorpiaq ikiorserneqartariaqarpoq, Aleqa Hammond isumaqarpoq, nunaqartullu oqaasiinik naalakkersuisut pimoorussinnginnerarlugit. Assiliisoq: Adam Lyberth

Naalakkersuisunut siulittaasuugallartup Jens B. Frederiksenip kuup superujussuarneranit suli nunaqarfimmit aarlerinartorsiortitsisumit aserukkat takuniarlugit unnummut aallarnissaa Aleqa Hammondip, Siumut, isumaqatigivallaanngilaa. Taarsiullugumi maannakkorpiaq ikiuuttariaqarpoq.

Læs "Millionregning venter"

- Politikerit Jens B. Frederiksenitut ittut ataatsimiillutik suliassamik kinguarsaanissaat Kangerlussuarmi innuttaasunit pisariaqartinneqanngilaq, maannakkorpiaq Kangerlussuarmi ikiuiartortussanik aallartitsisoqarnissaa innuttaasut pisariaqartippaat, Sermitsiaq.AG-mut oqarpoq.

- Aningaasaliissuteqannginnerminni ajoqusikkanik takunneqqarusunnera paasisinnaanngiliuk?

- Jens B. Frederiksenip aserukkanik qimerluuineratigut pissutsit sukkanerusumik aaqqinneqarnavianngillat. Immikkut ilisimasaliunngilaq. Taarsiullugu immikkut ilisimasalinnut aningaasaliisariaqaraluarpoq.

Læs "Jens B rejser til Kangerlussuaq"

Aleqa Hammond tamatuma saniatigut isumaqarpoq, Kangerlussuarmi pinngortitami ajunaarnersuaqarneranik borgmesterip Hermann Berthelsenip oqaasiinik pimoorussinerugaluaruni Jens B. Frederiksenip tulluarnerussagaluaraa.

Taama oqarpoq ullumi siusinnerusukkut Jens B. Frederiksen Sermitsiaq.AG-mut oqareersorlu Hermann Berthelsenilu pinngortitami ajunaarnersuup suuneranik assigiinngitsunik nassuiaariseqarnertik erseqqissuusoq.

Powered by Labrador CMS