Jens B Kangerlussualiarpoq

Naalakkersuisunut siulittaasuugallartoq attaveqarnermullu naalakkersuisuusoq Jens B. Frederiksen unnummut Kangerlussualiassaaq nunaqarfimmi sakkortuumik eqqugaasumi ajoqusikkanik takuniaalluni.

Tamanna Sermitsiaq.AG-mut ullaap-tungaani oqaatigaa ilisimatitsissutigalugulu aqagu ualikkut Nuummut uternissani naatsorsuutigigini.

Læs "Nødråb fra Qeqqata: Hjælp os"

Læs "Borgmester: Vi er ramt af naturkatastrofe"

- Pissutsit qanoq innerat takussavara, maannakkorpiarli aningaasatigut ikiuunnissaq itigartinnagulu neriorsuutigisinnaanngilara, oqarpoq.

Najukkami oqartussat pissutsinik oqaloqatigereerunigit tamanna aatsaat isummerfigisinnaanerarpaa.

Jens B. Frederiksenip tamatuma peqatigisaanik Qeqqat Kommuniata borgmesteria Hermann Berthelsen kaammattorpaa Kangerlussuarmi naapeqatigiinnissmik, sanaqqiinerup immikkoortortaanik assigiinngitsunik oqartussat sorliit akisussaanerat oqaluuserineqarsinnaaqqullugu.

Hermann, eqqissillutit
Jens B. Frederiksen tamatumunnga atatillugu oqarpoq, Kangerlussuarmi Mittarfeqarfiit ataavartumik attaveqarfigisimagini tamatumanilu innaallagissamik imermillu pilersuineq unittuussagaluarpata upalungaarsimanissamut pilersaarutaasa atorsinnaanissaat tatigilluinnarini.

Taamatuttaaq erseqqissaalluni oqarpoq, Hermann Berthelsenip pisunik pinngortitami ajunaarnersuartut inissiinera isumaqatiginngikkini.

- Hermann Berthelsenilu pissutsinik isiginnittaaserput assigiinngilaarsimassasoq ilimagaara, pinngortitamimi ajunaarnersuup suuneranik nassuiaasarnivut assigiinngitsuupput. Uannut pinngortitami ajunaarsuaq tassaavoq inuppassuit ajoquserfigisaat ajunaarfigisaalluunniit, matumanilu taama pisoqanngilaq.