Jens B Puisi pillugu: Suliaq uggornartoq

Puisimik suliami ajugaaniarnissaq namminersorlutik oqartussanit taamaatiinnarneqartoq Naalakkersuisunit uppernarsarneqarpoq. - Suliami ajugaanissarput ajornakusoorsimassagaluarpoq, oqartoqarpoq

Ineqarnermut, attaveqarnermut angallannermullu naalakkersuisoq Jens B. Frederiksen, Demokraatit. Foto Leiff Josefsen

- Suliamik taamaatitsiinnarnerput ilumoorpoq. Naalakkersuisunut siulittaasuugallartutut taamatut aalajangerpunga, Jens B. Frederiksen Sermitsiaq.AG-mut oqarpoq.

Taanna nassuiaalluni oqarpoq, suliami ajugaanissap ajornakusoornissaanik namminersorlutik oqartussani inatsisilerinermut allaffimmi eqqartuussissuserisullu suliffeqarfiannit avataaneersumit inatsisileritooqarnikkut naliliisoqareersorlu taama aalajangiisoqartoq.

Læs "Lars-Emil: Selvstyret dropper Puisi-sag"

Maajimi namminersorlutik oqartussat Nunatta Eqqartuussisuuneqarfianit nassuiaammik ilassutaasumik Puisi A/S-imut siulersuisut nunatta eqqartuussisuuneqarfiata pinngitsuutitsineranik tunngavilersuiffiusumik pissarsereersullu Inatsisilerinermut allaffik eqqartuussissuserisullu suliffeqarfiat avataaneersoq taama naliliipput.

Jens B. Frederiksen naapertorlugu ilassutaasumik nassuiaat ilisimannittut oqaaseqaataannik nutaanik, eqqartuussut namminersorlutik oqartussanit nangitassanngortinneqarmat ilisimaneqanngitsunik, saqqummiussiviusimasoq.

Aningaasartuutit isertuunneqartut
- Paasivarput tamanna taamaallaat pisinnaasimasoq siulersuisut sulinerat politikkikkut akuerineqarsimammat akuliuffigineqarsimammallu, taamaalillunilu siulersuisut akisussaatinnissaat ajornakusuulersinneqarsimalluni, Jens B. Frederiksen oqarpoq.

Suliaq tamaat uggornartutut oqaatigaa, ullumikkulli naalakkersuisooqatigiiusut isumatuumik iliuuseqarsimanerat torersumillu iliuuseqarsimanerat aalajangiusimanerarlugu.

Tassami suliaq iternga tikillugu misissuiffigineqartussaasimavoq siulersuisut akisussaanerinut atatillugu taama tunngaviutigisumik pissuseqarmat.

Taanna aamma isumaqarpoq, ullumikkut naalaakkersuisooqatigiiusut namminersorlutik oqartussat suliffeqarfiutaanni siulersuisunik ilisimasaqarluartunngortitsinerisigut siunissami suliamik assingusumik pisoqaqqissinnaaneranut iliuusissanik pitsaanerpaanik iliuuseqarsimasut.

Puisimik suliap namminersorlutik oqartussanut taamalu nunatsinni akileraartartut qanoq akeqarsimanera Jens B. Frederiksenip Sermitsiaq.AG-mut oqaatigerusunngilaa.

Powered by Labrador CMS