Ikiuuttusanik aallartitsisoqanngikkallassaaq
Naalakkersuisut ikiuuttussanik Kangerlussuarmut aallartitsinngikkallassapput, najukkamili tamatuma isumagineqarsinnaanera naatsorsuutigineqarnerarneqarluni. Ikaartarfilli aatsaat sapaatip-akunneri marluk pingasulluunniit qaangiuppata pilerseqqinneqarsinnaassaaq
- Naalakkersuisut tungaannit qanoq iliuuseqanngikkallassaagut, naalakkersuisunut siulittaasuugallartoq attaveqarnermullu naalakkersuisoq Jens B. Frederiksen, Demokraatit, nalunaarpoq.
- Mittarfeqarfiit pisortaat Jens Lauridsen oqaloqatigaara, taakkualu suliassamik isumaginnissinnaanera tatigalugu, tamatuma peqatigisaanik nalunngilara Qeqqata Kommunia suliniuteqarlualereersoq, oqarpoq.
- Kisianni qinnuigaakka pissutsit aqunneqarsinnaajunnaartutut inissisimalissagaluarpata uatsinnut naalakkersuisunut attaveqaqqullugit.
Sapaatip-akunneri marluk pingasulluunniit aatsaat qaangiuppata
Qeqqata Kommuniani issittumi ingeniøri Fritz Baumann naapertorlugu illoqarfiup immikkoortortai marluk aatsaat sapaatip-akunneri marluk pingasulluunniit qaangiuppata ikaartarfimmik atassuserneqaqqissinnaasut knr.gl-imut oqaproq.
Taanna oqarpoq sapaatip-akunneri marluk pingasulluunniit qaangiuppata aaqqiigallartoqarsinnaassasoq, septembarimi oktobarimiluunniit kuup ernga apparpat ikaartarfiup toqqavissai nutaat aatsaat sananeqarsinnaassammata.
Tamatuma peqatigisaanik ajornartorsiummik allamik Fritz Baumann tikkuaavoq:
- Nunaqarfimmi eqqakkat qaleriiaatiinnalersimasut ikaartarfikkullu aseqqukuusukkut assartorneqarsinnaanngitsut qanoq isumagineqarnissaannut aaqqiissutissamik nassaartariaqarpugut, knr.gl-imut oqarpoq.
- Nunaqarfiup ungasinngisaani utaqqiisaasumik eqqaavissualiornissamut pisortanit immikkut akuersissumik pissarsiniartariaqarpugut.