Aasianni inuussutissarsiortut kaammattorneqartut
Aasianni takornarianut kiffartuussivik nutaaq pisariaqartinneqassaaq Destination Avannaa ukiortaamit matuppat. Adam Hansen illoqarfimmi inuussutissarsiortut piareersaqqullugit qinnuigai
Aasiaat Turist Service ullumikkut Destionation Avannaa A/S'imit ingerlanneqarpoq. Kisianni 2009'mi kommunit allanngortinneqalermata aalajangertoqarpoq Destination Avannaa A/S ingerlatsivittut namminersortutut kingusinnerpaamik ukioq manna decembarip 31'anni unissasoq, illuatungaani Qaasuitsup Kommuniani inuussutissarsiornermut immikkoortortap ataani suliassanik allanik aallussissasoq annikitsuinnarmillu takornarianut kiffartuussinermik suliaqassasoq.
Tamanna tunngavilersuutigalugu Adam Hansen Destination Avannaa A/S, illoqarfimmi inuussutissarsiortut namminersortut allaffigai piareersaqqullugit, ullumikkut Aasiaat Turist Servicep paasissutissiivimmik allaffiata aamma pisinniarfiata takornarinik kiffartuussinermik ingerlatsisoq, takornarianik misigisassarsiortitsillutik angallassisartut annaassavaat - takornarianut kiffartuussivimmik nutaamik pilersitsisoqanngippat ullumikkut Aasiaat Turist Servicep kiffartuussinerata assinganik tunniussisinnaasumik.
TV'ikkut aallakaatitaq qulaani takuuk