IMAK-ip isornartorsiutaa ajuusaarnarpoq pissutissaqarnanilu
Naalakkersuisut ilinniartitsisut kattuffiata IMAK'ip isornartorsiutaat tapaallaatigaat eqqumiigalugulu
IMAK ippassaq naalakkersuisunik sakkortuumik isornartorsiuipput, kattuffittut isumaqarlutik demokratii pingaartinneqanngitsoq. Isornartosiuineq allakkatigut ammasukkut ingerlavoq uani atuarsinnaavat. naalakkersuisut maanna kissuteqarput:
- IMAK-ip siulersuisuisa Naalakkersuisunut allagaat Naalakkersuisut tupaallaatigalugu tupigusuutigalugulu atuarpaat.
IMAK-ip allakkamini ammasumi Naalakkersuisunut meeqqat atuarfiat pillugu inatsisissatut siunnersuut pillugu tusarniaassummik nassitsinikunut pasilliipput. IMAK-ip isumaa malillugu inatsisissatut siunnersuut immikkoortunik suleqatigiissitaliap nalilersugassaanik imaqarpoq. Tamanna eqqorpoq, tamannalu aamma Ilinniartitaanermut Ilisimatusarnermullu Naalakkersuisoqarfiup IMAK-imut nassuiarnikuuaa. Inatsisissatulli siunnersuutikkut suleqatigiissitaliap sulinera sutigulluunniit sioqqunniarneqanngilaq.
Meeqqat atuarfianni pitsaassutsip qaffatsinnissaa amerlanerusullu meeqqat atuarfianni naammassinermik kingorna ingerlaannartumik inuusuttut ilinniagaanni aallartinnissaat inatsisissatut siunneersuummi pingaarnertut siunertaavoq. Assersuutigalugu tassaapput atuarfiit pitsaassuseq pillugu ukiumoortumik nalunaarusiortarnissaat, atuartut quppersagaannik nutarterisussaataaneq, sunniutit uuttorneqartarnissaasa isiginiarneqarnissaa inuttullu atukkatigut kingornussat aamma atuarfiit pisortaasa akisussaaffiisa ersarissarneqarnerat. Tamakku tamarmik suliniutaapput meeqqat atuarfiannik tamanut pitsanngortitsisussaasut.
Siunnersuut nunaqarfinni atuarfiit tamarmik illoqarfimmi atuarfimmut ataatsimut aaqqissuussaanikkut ilanngunneqarnissaannik aalangersakkamik imaqarpoq. Siunertaq tassaavoq illoqarfinni atuarfinnik nunaqarfinnilu atuarfinnik annertunerusumik suleqatigiissitsilernissaq. Meeqqat atuarfiannik aaqqissuusseqqinnermi piffissap qiterpaarnerani nalilersuinermi tikkuarneqarpoq illoqarfinni atuarfiit nunaqarfinnilu atuarfiit annertunerusumik pitsaanerusumillu suleqatigiinnissaat ataqatigiissaarinissaallu pisariaqartinneqartoq. Tamanna Naalakkersuisut tusaaniarpaat inatsisissatullu siunnersuummi kinguneqartillugu.
Meeqqat atuarfiat pillugu inatsisissatut siunnersuut 2010-mi meeqqat atuarfiannik aaqqissuusseqqinneq pillugu piffissap qiterpaarnerani nalilersuinermi, Akileraartarneq Atugarissaarnerlu pillugit Suleqatigiissitap aamma Nunap Immikkoortuini Ineriartortitsinermut Periusissiami inassuteqaatinik ilimagineqartumik pisariaqartumillu ingerlatitseqqiineruvoq. Naalakkersuisut Ilinniartitsinermut Periusissiaanni aammattaaq allaaserineqarpoq inatsisini allannguutissat suliniutissallu allat suut aallartinneqarnissaat Naalakkersuisut ilimagineraat.
Naalakkersuisut Ilinniartitsinermut Periusissiaat pillugu Nassuiaammi tikkuarneqartutut kommunit, ilinniartitsisut suliaqarluartullu allat suleqatigalugit meeqqat atuarfiata pitsanngortinnissaa Naalakkersuisut immikkut isiginiarpaat. Meeqqat atuarfiat pillugu inatsisissatut nutaatut siunnersuut sulinermi tassani alloriaqqinneruvoq. Inatsisissatut siunnersuut tusarniaassutigineqarpoq, IMAK-ilu tusarniaaffigineqartut allat assigalugit inatsisissatut siunnersuutip oqaaseqarfiginissaanut periarfissaqarpoq.
Kikkut tamat oqartussaaqataaneranni tusarniaanerup unitsinneqarnissaa IMAK-ip tassunga taarsiullugu qinerunarpaa, innersuussutigalugu siunnersuummi immikkoortoq ataaseq IMAK-ip isumaa malillugu akissarsiat pillugit isumaqatigiinniarnerup naammassinerani angusat pillugit allakkiamut akerliummat. Tamanna paasiuminaappoq ajuusaarnarlunilu.
Allakkami ammasumi IMAK-ip pasilliuterpassui tunngavissaqanngitsut ajuusaarnartullu annertunerusumik oqallisigineqarnissaat kinguneqartussatut Naalakkersuisut isiginngilaat.
Meeqqat atuarfianni soqutigisaqartut Naalakkersuisut tusaaniarpaat, Naalakkersuisullu perorsaaneq, inuttut atugarisat aningaasaqarnerlu eqqarsaatigaat. Inatsisissatut siunnersuummi suliaqartut, atuarfimmit namminermeersut soqutigasaqartullu allat, inassuteqaataannik tunngaveqarpiarpoq. Meeqqat atuarfiini atuartitsinerup atuartunut inuiaqatigiinnullu iluaqutaasumik pitsanngorsartuarnissaa isiginiarneqarpoq.
Naalakkersuisut suleqatiginninniarput soqutigisaqartunullu tamanut, sooruma aamma IMAK-imut, aporaanniarsarinatik.