Sume atorpaat 'Qullissat'
Sume aamaruutissarsiorfiup ukiut 40't matuma siorna matuneqarnerat malunnartinniarlugu aasarsioqatigiinnermi Sume qaaqqusaasimapput. Nipilersornerannit asserpassuit takukkit
Sume qangalili tusarnaarterpassuaqartarput. Tusarnaartitsisarneri inunnik ornigarneqarluartuaannarput naak erinarsugaat 70-80'ikkunneersuugaluartut taamaattoq inunnik amerlasuunik kateritsitsisarput. Tamanna aamma malugineqarisinnaavoq Qullissani nipilersormata inuimmi qanittumit ungasissumillu 'tusaamasarsuarnik' tusarnaariarlutik tikiussorput.
Tusarnaartitsinerup aallartilernerani Qullissani sissami umiatsiat 150-180 tungaannut amerlassuseqarput amerlaqisullu tusarnaartitsineq naammat aallakaaqillutik.
Arfininngornermi unnukkut katersortarfiup silataani Sume nal. 22.00 tusarnaartitsinerat aallartimmat qulisimalluni qiianarpoq.
Katersortarfik angivallaanngilaq inunnit taamaallat 100 missaannik isersimasoqarsinnaalluni, taamaammat naak sila qiianaraluartoq Qullissat Ikinngutaat torrallaasumik aalajangersimapput tusarnaartitsineq silami ingerlanneqassasoq, inuimmi 1000 missaat Sume'kkut tusarnaariarlugit tikiussorsimapput.
- Sisimiunit Qullissiarpugut Sume'kkut tusarnaarnissaat pingaarnerutillugu. Kisianni taamak ungasitsigisumik angalasimanngikkaluarpugut tusarnaartitsineq Qullissani ingerlanneqarsimassanngitsuuppat. Taamaattumik pingaaruteqarpoq tusarnaartitsineq Qullissat matunerannit ukiut 40'it malunnartinneqarneranut atammat, tusarnaariat ilaat oqaluttuarpoq.
Erinarsuut 'Qullissat' 1974 immiunneqarpoq aatsaallu perngaamik Sume'kkut erinaq taanna Qullissani atorpaat.
Sume tassaapput Malik Høegh, Per Berthelsen, Hans Fleischer, Hjalmar Dahl, Emil Larsen, Hans Frederik Olsen, Sakiu Nielsen aamma Titken Jakobsen.