KNR-ip qallunaamik sulisussarsiorneq peqqissimissutigigaa
Minutsit arlaqanngitsut matuma siorna tikillugu KNR Radioaviisimut aaqqissuisumik "nunamik allamik kulturimillu allamik ilikkagaqarnissamut sapiissusilimmik" sulisussarsiorpoq. Maanna inuttassarsiuussineq tunuartinneqarpoq
KNR-ip inuttassarsiuussinermi ussassaarut radioaviisimut aaqqissuisumik pissarsiorfiusoq ingerlaannaq atuutilersumik tunuartippaa.
Taama pisoqarpoq "oqaaseqatigiiliorneq tulluarpallaanngitsoq" aaqqissuisoqarfimmi aqutsisunit paasineqareersorlu. Tassami inuttassarsiuussinermi ussassaarut tusagassiorfiup qallunaanik/nunanit allaneersunik qinnuteqartussarsiorusunneruneratut paasineqarsinnaavoq.
Ussassaarummi ima allassimasoqarpoq: "Aaqqissuisutut uatsinni aqutsisoqatigiinnut ilaalissaatit. Peqataarusukkuilli naatsorsuutigissavarput nunamik kulturimillu allamik ilikkagaqarnissamut sapiissuseqartutit".
Inuttassarsiuussinermi ussassaarummi atuarneqarsinnaavoq qinnuteqarnissamik soqutiginnittut radioaviismi akisussaalluni aaqqissuisumut Jens Thorinimut sianerlutik allallutilluunniit paasiniaasinnaasut.
Taanna Sermitsiaq.AG-mit attaveqarfigaarput paasiniarlugu nutaarsiassaqartitsivik pisortanit tapiiffigineqartartoq qinnuteqartunik kalaaliunngitsunik pissarserusunnerunersoq?
- Naamik, qinnuteqartunik tamalaanik pissarserusuppugut. Qinnuteqartut amerlanerunissaat kissaatigisimavarput, taamaattumillu oqaaseqatigiit taakkua toqqaqqaarsimallugit, Jens Thorin akivoq.
Sooq allappisi qinnuteqartoq "nunamik allamik ilikkagaqarnissamut sapiissuseqassasoq"?
- Tamanna aamma kukkunerugunarpoq. Qallunaajunissaa allaminngaanneersuunissaaluunniit siunertaanngilaq. Siunertaanngilluinnarpoq.
Ussassaarut nittartakkassinnit peerneqaqqammerpoq. Sooq?
- Paatsoorneqarsinnaagunarmat oqaaseqatigiit allanngortinnissaanut periarfissaqalaarusukkatta, Jens Thorin akivoq.
Atorfik Danmarkimi inuttassarsiuunneqarpa?
- Aap, tusarpara tamanna Ritzaus Bureau aqqutigalugu pissasoq.
Inuttassarsiuussinermi ussassaarut nutaamik oqaasertalersugaq qaqugu saqqummiunneqassava?
- Iluarsinissaa tamaviaarluta sulissutigaarput. Tamanna erniinnaq pissaaq, Jens Thorin akivoq.
Kiffartuussinermi ilisimatitsissutitut Sermitsiaq.AG-mit ilisimatitsissutigisinnaavarput qinnuteqarnissamut piffissaliussaq tassaammat juulip ulluisa 23-at, atuartartut akornanni qinnuteqarnissamik soqutiginnittoqassagaluarpat.