Qulllissara-mi aliasunneq nuannaarnerlu

Tallimanngormat isiginnaartitsissusiap aallartinnissaa akunnermik ataatsimik sioqqulluguli inuit aamaruutissaqarfimmi inuerussimasumi Qullissani katersortarfimmut isaalereerput "Qullissara"-p takuteqqaarneqarnissaani inissaqarumallutik.

Nunatta Isiginnaartitsisarfiata Ilulissani Qullissat Ikinngutai suleqatigalugit Qullissat pillugit isiginnaagassiaq sanasimavaa, taannalu Qullissani takuteqqaarneqarpoq.

Inissalli killeqarnerat pissutigalugu amerlasuut sapaammut, isiginnaagassiap takuteqqinneqarnissaanut, utaqqisariaqarput.

Pilluarneq nuannaarnerlu
Isiginnaagassiaaq najuuttunut misigissutsinik tamanik qaffakaatitsivoq. Ilaat illoqarfik matummalli tassunga peqqinngisaannarsimapput, allat aasat tamaasa takkuttarsimallutik. Eqqaamasarpassuit qaffakaatinneqarput. Kingornatigulli misissuseq atorneqarnerpaasoq tassaavoq pilluarneq nuannaarnerlu, isiginnaagassiami pisarsimasut nuannersut quianartullu sammineqarmata, erinarsuutinik nuannersunik akullugit nipilersortartulerlunilu.

Nipilersoqatigiit Qullissara-band Vajgat Orkestret nipilersortagaanik atueqattaarput, akornisigut Else Danielsen Qulissat oqaluttuassartaanik tulleriiaarlugu oqaluttuartarluni. Tamanna peqatigalugu pisunik quianartunik, ilitsersuisup Makka Kleistip, Qullissani inunngorsimasup peroriartorsimasullu, puigukkiussimasai oqaluttuarineqartarlutik.

Erinarsuutit nuannersut

Nipilersoqatigiit Qullissara-band erinarsuutit atorpaat soorlu "Nuna Hawaii", "Seqernup qinngorpaa", "Aasarissuup unnuaani", "Kiinnat saamajuartoq" erinarsukkallu allat ilisimaneqarluartut.

Erinarsukkat kusanartumik atorneqarput Kimmernaq Kjeldsenimit Pilu Noahsenimillu, nipilersortuullutik Mike F Thomsen, Hans Jørgen Damgaard, Jens Nielsen aamma Villads Sandgreen.

Nipilersortut pisortaraat Christian Søgaard.

Qullissara aamma ulluni aggersuni Qullissani takutinneqartassaaq.