Nunarput ornigassat nuannarineqarnerpaartaraat
Costa del Sol ornigassallu allanartut puiguinnakkit. Nunatsinnimi aasaanerani feeriarusuttoqarneruvoq
Ukioq manna Sermitsiaq.AG-mik atuartartunit nunarput aasaanerani sulinngiffeqarnermi ornigassaqqinnerpaatut atoqqarneqarpoq. Nunatsinni Danmarkimilu nittartakkamik atuartartut affangajaannit nunarput aasaanerani sulinngiffeqarnermut atatillugu ornigassatut toqqarneqarpoq. Tullersortaavoq Danmark, ukioq manna taasisut sisamararterutaannit aasarsiorfigineqartussaq.
Tamanna maani nittartakkami taasisitsinermi takutinneqarpoq.
Atuartartunit nunatsinni najugaqartunit 56 procentit nunatsinni feeriassapput, 28 procentit Danmarkiliassasut 16 procentillu nunarsuarmi nunanut allarluinnarnut feeriassallutik.
Sermitsiaq.AG-mik atuartartut Danmarkimi najugaqartortaat aasaq manna aamma nunatsinnukaalluassapput.
Amerlanerpaammi nunatsinnut feeriassapput, taakkunanngalu ikinnerulaaginnartut Danmarkimi feeriassallutik.
Atuartartulli 10 procentiinik sinneqartut ukioq manna aasaanerani feeriassanngillat, taakkuali aamma aasarsiorluarnissaannik kissaakkusuppavut.