Aviâja aamma Kuupik katimmata asanninneq ersareqaaq
Aviâja Vandersee aamma Kuupik Kleist nuannernerpaamik katitinneqarput avatangiisini pinnersorsuarni
Sapaat juulip arfineq-aappaat 2012 inunnut hornorujulikkaanut puigunaatsumik eqqaamasassanngorpoq naalakkersuisut siulittaasuat Kuupik Kleist aamma Aviâja Vandersee aamaruutissarsiorfiusimasumi Qullissani katimmata, tamaa Kuupik Kleist inunngorpoq alliartorlunilu.
Qupannaat qarlulaarpalaarput seqinerlu qilammit nuiaqanngitsumit kissassimaatitsivoq, aappariit ilaquttatik ilagalugit Qullisani illunit avannarlernit najugaqarfigisaminnit, sissaq sinerlugu sikunik kusanaqisumik isikkivilerlutik "aqqusernit pingaarnersaannut" ingerlaarnerisa nalaanni illoqarfiup avatinnguani arfersuaq pueqattaarpoq. Aqqusinermit oqaluffiup nappavianut illoqarfiup qatsinnersaasa ilaanut ingerlapput aqquserngup sinaa naasunik assigiinngitsunik ulikkaartoq.
Inuit illunit tupernillu aniallutik aappariinnik malinnipput allat qattunermit ingerlaaqatigiinnik isiginnaarniarlutik siuarsimasut.
Oqaluffiup tungaanut aqqut tamaat inuit sumit tamanit takkussuupput, borgmester Jess Svane qaqortumaarluni allattaalu Dorthe Løvstrøm Mathiesen aappariinnik katititassaminnik utaqqisut. Aappariit oqaluffimmut apuummata inuit 5-600 katersuussimapput.
Oqaluffiup tummirai silittut maanna cementiinnanngorsimasut naasunik pinngortitamit qorsooqisumit katersanik pinnersagaavoq, tunngaviup naqqani katititsiffiusussami naasuliviit immerneqarsimasut iliorarneqarsimapput. Qullissat-bandi nipilersorput katititsinissamik utaqqinermi.
Aviâja Karina Vandersee aamma Kuupik Jakob Edvard Kleist imminnut angerfigeqatigiipput, neriorsueqatigiillutik imminnut asallutik ataqqeqatigiinnissaminnik, kingorna asannippaloqalutik imminnut isigipput kunillutillu. Qullissat-bandi nipilersoqqipput atorlugu Tasinnguup sinaani, erinaq nuannersoq Vajgat Orkestremit atorneqartartoq, tulliullugu atorpaat Nuanneq niperput, erinaq qiimasoq.
Katinnerup kingorna nunatsinni naalakkersuisut siulittaasukkormiut atii aamma allanngorput, maannakkut ateqalerlutik Aviâja Vandersee Kleist aamma Kuupik Vandersee Kleist.
Aappariit uppernarsaasutut toqqarsimavaat Johan Lund Olsen aamma Lona Lynge taakku tamarmik aappariinnut ikinngutaalluarput.
Nuannerluinnartumik katititsinerup kingorna katersortarfimmi kikkunnut tamanut kaffillertoqarpoq ilaatigut mattak panertullu sassaalliutigineqarlutik.