Kujataani tuttut 500-it tuttuuteqarfiup avataaniittut
Kujataani tuttut neriniartitsiviup avataanut pisarput, imaanngilarli killeqanngitsumik piniarneqarsinnaassasut
Tutttut 500-t angullugit amerlassusillit Kujataani neriniartitsivisiusunit aniasarsimassasut tamaani piniarnermut nakkutilliisoq naliliivoq.
Tamanna Kujataani tuttut pillugit Ruth Heilmannip paragraf 37 malillugu apeqquteqaataanut aalisarnermut, piniarnermut nunalerinermullu naalakkersuisup Ane Hansenip akissutaani atuarneqarsinnaavoq.
Ane Hansenilli Ruth Heilmannimut akissutimini tuttorpassuilli tamakkua pisassiissuteqarfigineqarsinnaannginnerarpai, tuttut siutimikkut nalunaaqutserneqarsimasut pinianeqaqqusaanngimmata, tamannalu tuttunut nujuitsunut inatsisit malillugit piumasaqaataavoq.
Ruth Heilmannip ilanngullugu paaserusuppaa kujataani tuttorpassuit naasoqassutsimik aserorterisuunersut, akissummilu atuarneqarsinnaavoq Naalakkersuisut aasaq manna 1996-imiit siullermeerutaasumi tamaani naasoqassuseq misissuiffigitinniaraat.
Tuttuuteqarfik Kangerluatsiamiittoq Sannerutip Imaata Sermiliullu akornanniittumik neriniartitsiveqarpoq. Ukiortaap nalaani kingullermik kisitsisoqarmat Kujataani tuttut nujuitsut 2700-nik amerlassuseqarput.