Kukinnut tarngut navianarsinnaavoq
Ilisimatusarluni suliat kingulliit paasinarsisippaa kukinnut tarngutit, iffiornermi pappiara sialussiutit assigisaallu iviangikkut kræfteqalernissamut ilapittuutaasinnaasut. Kalaallit arnat kræftimik misissuinermi peqataapput
Aarhus Universitimi ilisimatusartut isumaqarput ulluinnarni atortorissaarutiniittut akuliussat hormoninik innarliisinnaasut inerteqqutaasariaqaraluartut. Tamakku tassaapput PFC, sialussiutini, pizzat puuini aamma iffiornermi pappiaqqani, kukiit tarngutaanni tandtrådinilu ilaatigut nassaassaapput.
Tamakkua aarlerinaatigaat arrortikkuminaannertik pissutigalugu iviangikkut kræfteqalissutaasinnaammata.
Tamanna ilisimatusarluni suliniutip nutaap kalaallinik arnanik iviangikkut kræfteqalersimasunit peqataaffigineqartup. Inerneraa aatsaat perngaamik oqartoqarsinnaasoq iviangikkut kræfteqalerneq aamma perfluorcarboninit annermik sunnerneqartalerneq imminnut ataqatigiittut.
1966 tikillugu iviangikkut kræfteqalertarneq Kalaallit Nunaanni takornartaaqaaq. Kalaallit arnat iviangimikkut kræfteqartut akornanni misissuinermut tunngaviuvoq nappaammut patsisaasut erseqqinnerusumik paasineqarsinnaanerat.
- Qularutissaanngilaq Kalaallit Nunaanni innuttaasut ukiuni kingullerni 40-50'ini kitaani inooriaatsimik ingerlatsileraluttuinnarsimanerat, taamaattumillu iviangimikkut kræfteqartartut amerliartornerat tassuuna ilaatigut nassuiarneqarsinnaalluni, professor Eva Bonefeld-Jørgensen, Aarhus Universitetimeersoq oqarpoq, taanna aamma isumaqarpoq atuisartut ilisimatinneqartariaqartut pisiassat puui sunik akoqarnersut. Ullumikkut assersuutigalugu iffiornermut pappiaqqat nalunaaqqutsigaapput "svanemærket" qussummik, akuutissanik ulorianarsinnaasunik ilaqaratik, amerlanerpaartaatigulli atuisut ataatsimilluunniit periarfissaqanngillat pisiamik poortuutaat PFC'imik akoqarnersut.
Allaaserisaq atuagassiami Environmental Health'imi naqiteqqammivoq.