Kalallit nipilersortartut Roskildemi appissasut

Small Time Giants aqagu Roskilde Festivalimi nipilersussapput. Taamaalilluni ukioq manna festivalimi tassani Nunatsinnit peqataasoqariataarpoq

Small Time Giants aqagu Roskilde Festivalimi tusarnaartitsissapput. Assi: Tusagassiivinnut nassiussaq.

Small Time Giants aqagu pingasunngornermi Roskilde Festivalimi nipilersussapput. Aqagu tassaavoq festivalip aallartivinnginnerata siorna ulloq kissarserfik kingulleq.

Tusarnaartitsineq aallartissaaq nal. 14.00 Dansk Flygtningshjælps Ungenetværkip tupeqarfiata eqqaani.

Dansk Flygtningshjælps Ungenetværkimik suleqateqarneq pissuterpiaavoq Small Times Giantsit tusarnaartitsisinnaanerinut tunngavippiaq. Inuusuttut suleqatigiiffiat ukioq manna aningaasanik katersipput qimaasut inuusuttortaasa Athenip aqquserngini najugallit pitsaanerusumik atugassaqalernissaannut atugassat.

- Immikkut ittumik nuannaarutigaarput Europami ajornartorsiutip isiginngitsuusaakkap ersersinniarneqarnissaanut peqataaqataasinnaagatta, Small Time Giants'init oqaatigineqarpoq.

- Roskilde Festivalimut atatillugu allaanerusumik inissititerivugut taamaalioruta festivalip ingerlanerani ajornanngitsunnguamik piffinni assigiinngitsuni nipilersorsinnaalluta. Neriuppugut tamassuma nassatarissagaa inuit amerlanerujussuit nipilersukkatsinnik soqutiginnilernerat aamma inuit amerlanerusut paasissagaat Athenimi inuusuttut amerlaqisut angerlarsimaffeqanngitsut ikiortariaqartut.

Sermitsiaq.AG ulluni kingullerni Roskilde Festival ornittarpaa mannalu tikillugu kalaallit inuusuttut arlallit puttuttarput. Soorlu tupersimaqatigiit Camp Kalak tusarluassaqigaat Small Times Giants nipilersussamaartut.

Sapaatip akunnerata ingerlanerani tusarnaartitsineq pillugu sermitsiaq.ag. tusarliussaqaqqikkumaarpoq.

Powered by Labrador CMS