Angallatit nuannaariartaatit akitsuuseqalissapput
Naalakkersuisut angallatit nuannaariartaatit akitsuuteqalernissaat ilimasaarutigaat
Naalakkersuisut akileraarutit pillugit nutaamik siunnersuusiornerminni angallatit nuannaariartaatsit akitsuuseqalernissaat ilimasaarutigaat.
Aningaasaqarnermut naalakkersuisoq Maliina Abelsen naapertorlugu tamanna 5 million koruuninik isertitsissutaassaaq. Tamanna erserpoq naalakkersuisut tallimanngormat juunip 29-ani tusagassiuutitigut nalunaarutaani.
Sapaatit akunneri maluunngitsulluunniit Maliina Abelsen Sermitsiamit aperineqarami oqarpoq angallatit nuannaariartaatsit sunngiffimmilu umiatsiat akitsuuserneqarnissaannik pilersaaruteqaratik.
Aperineqarnermini Maliina Abelsen Sermitsiami normu 24-mi juuni 15-aneersumit 2012-mi ima akivoq:
- Maannakkut taamaattunik aalajangiisoqarsimanngilaq.
Tamannali itigartivinngilaa.
- Akissarsiatigut akileraarnerup appartinneqarsinnaaneranut atatillugu aningaasarlersuinissamut periarfissat arlaqartut eqqartorpavut, soolu aamma akileraartarnermut atugarissaarnermullu isumalioqatigiissitap innersuussutai naatsorsorlutigik, Maliina Abelsen aviisi naapertorlugu oqarpoq.
Akileraartarnermut atugarissaarnermullu isumalioqatigiissitap isumaliutersuummini siunnersuutigaa "angallatit akitsuuserneqarsinnaanerat sulissutigineqassasoq akitsuuseriaatsip agguataarinermut sunniutai annertusiniarlugit angallatillu nuannaariartaatsit akitsuusernissaat qulakkeerlugu".
Maliina Abelsenili naapertorlugu tamanna eqqunniarneqanngilaq, juunip 15-ani aviisi naliliivoq. Maannakkullu sapaatit akunneri marluinnaat qaangummata angallatit nuannaariartaatit akitsuusernissaannik inassisissatut siunnersuummi tusarniaassutigineqartumi pilersaarutigineqarpoq.
2010-mi taamanikkut aningaasaqarnermut naalakkersuisoq Palle Christiansen ilimasaarivoq angallatit nuannaarirtaatsit aamma akitsuuserneqariaannaasut.
Ukioq taanna Kuupik Kleistip ilimasaarutigaa annertuumik akitsuuteqartitsisoqarniartoq, taamanikkullu Demokraatiniit aningaasaqarnermut oqaaseqartartoq Niels Thomsen allaaserisami tassani oqarluni angallatit nuannaariartaatsit akitsuusiinermi aallarniutissaqqissut.