Dronningip kiffaa ilumoortoq nersornaaserneqartoq
Ceremonimester aamma kammerherre Christian Eugen-Olsen ippassaq Nersornaammik sølviusumik saqqarmiulerneqarpoq
Dronningens Margrethep kiffaa ilumoortoq, kammerherre aamma ceremonimester Christian Eugen-Olsen, ippassaq Nersornaammik sølviusumik Inatsisartut siulittaasuannit Josef Motzfeldtimit saqqarmiulerneqarpoq.
Tamanna pivoq Kalaallit Nunaata Sinniisoqarfiani Københavnimiittumi persuarsiornartumik aaqqissuussisoqarnerani, Eugen-Olsenilu nersornaaserneqarpoq Josef Motzfeldt naapertorlugu Kalaallit Nunaata nutaaliaasup piorsarsimassutsikkut ilinniartitaanikkullu ineriartorneranut sinaakkutissanik piorsaaqataasimanini pillugu.
- 1990-imiilli kunngikkormiuni ceremonimesteritut kammerherretullu kunngikkormiut Kalaallit Nunaannut tikeraartarnerpassuinut - angisuunut annikitsunullu - aaqqissueqataasarsimavutit, taamatuttaarlu Inatsisartut Naalakkersuisullu kunngikkormiunut attaveqarnerannut pingaarutilimmik attaveqaataasimallutit. Suliatit aqqutigalugit kunngikkormiut Kalaallit Nunaannut tikeraartarnerisa ataqqinassuseqarluartumik inuiannullu kalaallinut ataqqinnittumik ingerlanneqartarnissaat qulakkeertarsimavat, Josef Motzfeldt Eugen-Olsenimut oqalugiarnermini ilaatigut oqarpoq.
- Suliassat tamakku piginnaaneqarluarlutit Kalaallit Nunaannilu piorsarsimassutsimut paasinnissinnaassuseqarluarlutit isumagisarsimavatit kunngikkormiullu tikeraarnerannit Kalaallit Nunaata isigineqarnerata nukittorsarneqarnissaanut annertuumik tapersiissuteqartarsimallutit, Josef Motzfeldt oqarpoq.
- Kalaallit Nunaannut suleqataanerit Universitetsparkenimut tapersersuiniarluni komitemut peqataanikkut aamma ersersinneqarpoq kingullermillu Kalaallit Nunaanni Eqqumiitsulianik Katersugaasivimmik pilersitsiniarluni suliniarnermut peqataanikkut.