- Fleischer isertuussaqarsimanngilaq

Sermitsiap aaqqissuisuunerata Tusagassaqartitsiviullu Sermitsiaq.AG-p pisortaanerata Poul Krarupip Jørgen Fleischer, aviisit taakkua marluk oqaluttuarisaaneranni aalajangiisuusumik inissisimasimasoq, eqqaaniarpaa

ip Jørgen Fleischeriugaluaq tusagassiortutut oqallissaarisutullu nalissaqanngitsutut nersorniarpaa. Ass.: Hans Jukku Noahsen Poul Krarup

Jørgen Fleischer tusagassiortoq kakkalluinnartuusimavoq, oqaatsillu marluk sapigarinngilluinnarsimallugit.

Tusagassiornermini tunngavigissaarsimavoq. Allaaserisani ilisimasaqarfigisarpai. Uummannap eqqaani nunaqarfimmi Ikerasammiutut kingornalu Aasianni efterskolernermigut Nuummilu seminariami atuarnermigut tunngavissaqarsimavoq, tamannalu nukittorsarneqarpoq qallunaat aviisiini aamma Danmarks Radiomi tusagassiortutut ilinniarneranik, tamatumalu kingorna 1957-imi nunatsinni tusagassiorfinnut uterpoq 1962-imilu Atuagagdliutini aaqqissuisuuninngorluni.

Atorfik taanna atorfigaa 1987-ip tungaanut, taamanikkut kamaalluni soraarami, aaqqissuisoqarfiup suliaanut siulersuisunut akulerummata aviisillu saqqaa allanngortillugu.

1958-imi Sermitsiaq aallartitseqataaffigaa, aviisitut killilersorneqarani saqqummiussiffiusinnaasutut.

1960-ikkunni Inuit Partiiat aallartitseqataaffigaa, maanna politikkikkut partiinut aallarniutaasoq.

Ukiulli ingerlaneranni ilisimaneqarneruvoq oqaaseqartartutut allaaserinnittartutullu. Immaqa ullumikkut taama soqutiginartiginngilaq kikkut tamarmik suut tamaasa nettikkut oqaaseqarfigisinnaammatigit, siusinnerusukkulli Fleischer tusaaniarneqartarpoq. Pissutigalugu oqaaseqartartuummat qilersorsimanngitsoq isertuussaqanngitsoq.

Isummanilu attatiinnartarpai, aamma nunap politikkikkut siuttuinut isumaannullu akerliugaangata, soorluttaaq kalaallit tusagassiorfiini qallunaat aaqqissuisut isornartorsiortarai - qallunaajunerat pissutigalugu, pissutigaluguli kalaallisut oqalussinnaanngimmata.

Ukiut ingerlaneranni isummersorfippassuarnik isumaliutersuuterpassuarnillu allattarsimavoq kiisalu Kalaallit Nunaat pillugu arlalinnik atuakkiorsimalluni.

1987-imi AG-mut soraarnerminiilli Fleischer Sermitsiami aalajaatsumik allaaserinnittartuuvoq sapaatip akunnikkaartumik isummersorfimminik. Sermitsiami isummersorfimmini kingullermi tallimanngornermi juunip 22-anni saqqummersumi, sammivaa Aatsaammi asuli pisorsuit! tassani Kinamiut Kalaallit Nunaanni soqutiginninnerannik qallunaat tusagassiorfiisa samminninnerat saassutaralugu.

Powered by Labrador CMS