Thursday, June 28, 2012 - 12:30

Qanoruup feriarnera Mimip iluaraa

Ilaqutariinnut, kulturimut, ilageeqarnermut naligiissitaanermullu naalakkersuisup Mimi Karlsenip, IA, Qanoruup aasaanerani matoqqanera iluaraa. Ass.: Leiff Josefsen
Aasap ingerlanerani sapaatip akunnerini tallimani KNR ataasinnguamilluunniit nutaarsiassanik aallakaatitsinngilaq - tamannalu KNR-mit eqqarsarluarneruvoq, Mimi Karlsen oqarpoq 

KNR-p nutaarsiassaleriffia Qanorooq ukioq maanna sapaatip akunnerini tallimaannarni aasaanerani uninngassaaq, siusinnerusumulli sanilliullugu, aasaanerani uninngasarnerup sapaatip akunnerinik qulinik sivisussuseqartarneranut, aasaanerani aallakaatittagaq Aasaanerani aallakaatinneqanngilaq, tamannalu pissutigalugu kalaallit innuttaasut tamanut siammarsaavimmit TV-kut nutaarsiassat sapaatip akunnerini tallimani pinngitsoortariaqarpaat.

- KNR-p aallakaatitaminik katiterisarneranut akulerukkusunngilanga, KNR-lli aaqqiissutaa paasisinnaalluarlugulu akuersaarpara, isumaqarama tamanna eqqarsarluarnerusoq, kulturimut naalakkersuisoq Mimi Karlsen, Inuit Ataqatigiit, Sermitsiaq.AG-mut oqarpoq.

Atuaruk "Qanorooq sapaatip akunnerini tallimani matoqqavoq"

- Nunami maani aasaq sivikitsuuvoq, taamaattumik angerlasimallutik TV-kut isiginnaartut amerlanngeqaat, nangilluni oqarpoq.

KNR aningaasanik amerlanerusunik tunineqassanngilaq
- Isertugaanngilaq KNR aningaasaliiffiginikippallaarneqartartoq, taava KNR aningaasanik amerlanerusunik tuniinnarsinnaanngiliuk ukioq naallugu nutaarsiassanik aallakaatitsisarniassammat?

- Pissutsit taamaatsillugit KNR-mut tunniussinnaasatsinnik aningaasaateqanngilagut. Aningaasat KNR-p pisartagai naammassapput. Isumaqarpungalu KNR-p suliassaq tamanna kanalillu pitsanngorsarnera naammassilluarsimagaa, Mimi Karlsen oqarpoq.

- Nunani allarpassuarni tamanut siammarsaavimmi aasaq naallugu TV-kut nutaarsiassaqannginnera akuerineqarnavianngilaq. Sooq tamanna Kalaallit Nunaanni ajunngila?

- Kalaallit Nunaanni pissutsit immikkut illuinnartut atorpavut, Kalaallillu Nunaanni nutaarsiassalerineq unammillernartuuvoq, innuttaasutut tunngaviit taama ikitsigimmata aningaasaqarniarnerlu taama killeqartigimmat. Imaanngilarli nutaarsiassaqanngilluinnartoq, Radioaviisi aasaq naallugu aallakaatitsivoq, taamaattumik inuit tassannga nutaarsiassanik pissarsisinnaapput, Mimi Karlsen oqarpoq.

Politikerit aamma freerput

- Nuannaarutigiinnanngiliuk taamaasilluni politikerit aasaq naallugu uparuarneqaratik nutaarsiassanik pitsaanngitsorpassuarnik tamanut saqqummiussisinnaammata, nutaarsiassat TV-kut isiginnaarneqarsinnaanngimmata?

- Eqqissisimalluinnarsinnaavutit, uagut politikerit aamma aasaq naallugu annikitsuinnarmik sulivugut, Mimi Karlsen oqarpoq.

Kiisalu erseqqissarpaa nammineq KNR-llu siumut isigisumik sulissutigigitsik Kalaallit Nunaanni siunissami tusagassiorfimmi neqeroorutit qanoq ittuussanerut, taamaasilluni piffissaq ungasinnerusoq isigalugu aasaanerani TV-kut nutaarsiassat immaqa uninngasarunnaassallutik.

 

Seneste nyheder / Nutaarsiassat kingulliit