Nunaqarfinni toqqissisimanerulernissaq neriuutigineqarpoq

Kommunefogedit akissarsiaasa qaffannissaat neriulluarsaarivoq imaassinnaammat nunaqarfiit tamavimmik kommunefogedeqalersut

Nunaqarfinni toqqissisimaneq annerulissagunarpoq, Kanunupemit tutsiuppoq. Assi: Polfoto, Karsten Bidstrup

Siunissami kommunfogedip aningaasarsiaat ukiumut 75.000 koruuninngorluni qaffassaaq. Ullumikkut tamakku 7.300 aamma 50.000 akornanni aningaasarsisarput nalunaaqquttap akunnermusiaat ilaanngullugit.

Tamanna neriulersitsivoq nunaqarfinni 17'ini ullumikkut kommunefogedeqanngitsuni siunissami peqalernissamut.

Taamak oqarpoq nunaqarfiit peqatigiiffiannut siulittaasoq Jens Kristian Therkelsen, KNR'ip radioavisianut oqarpoq.

- Pingaaruteqartorujussuuvoq ilisimaneqarmat akissarsiat tunngavigerpiarlugit suliffik piumaneqarneq ajormat, taanna oqarpoq.

Aningaasarsiat qaffannissaat sapaatip akunneri marluk qaangiuppata tassa juulip aallaqqaataanit atuutilissaaq.

Jens Kristian Therkelsenip naatsorsuutigaa akissaatit qaffannerisa kingorna amerlasuut kommunefogeditut qinnuteqassasut tamatumalu nassataani nunaqarfinni toqqissisimaneruneq anguneqarluni.

- Nunaqarfiit tamarmik kommunefogedeqalissappata nunaqarfinni toqqissisimanerulernermik nassataqassaaq, taanna radioavisimut oqarpoq.

Powered by Labrador CMS