Villy: Issittumi pissaanilissuuvugut

Naalagaaffeqatigiinnermikkut Danmark, Kalaallit Nunaat Savalimmiullu Atlantikup avannaani Issittumilu pissaanilissuupput, nunanut allanut minsiteri oqarpoq

Danmark Kalaallit Nunaat peqatigalugu Issittumi pissaanilissuuvoq. Taama ullumi Allingimi innuttaasut ataatsimeersuarnerani Villy Søvndal oqarpoq. Foto: Arktis Media

Naalagaaffeqatigiinneq Issittorlu pingaartinneqassapput. Taama oqarpoq nunanut allanut ministeri Villy Søvndal SF-meersoq, ullumikkut Bornholmimi innuttaasut ataatsimeersuarnerani tusarnaartunut untritilikkaanut oqalugiarnermini.

- Danmark Savalimmiunik Kalaallillu Nunaannik naalagaaffeqateqarnermigut Atlantikup avannaani Issittumilu pissaanilissuuvoq, Villy Søvndal ullumi oqarpoq.

- Sumiiffimmi allami sumi taamatut nunat sananeqaatasigut inissisimanerisigullu pissaanilissuartut immitsinnut suaarutigisinnaavugut? Ukiuni tulliuttuni Issittoq pingaartilluinnartariaqarparput, nunanut allanut ministeri oqarpoq.

Kalaallit Nunaat puisinik qilaatersornermillu inuussuteqarsinnaanngilaq
Issittup saniatigut avatangiisit silallu pissusaa, tamat naalakkersueqataanerat inuillu pisinnaatitaaffii, sakkunik ikilisaaneq Asialu nunat tamat akornanni Danmarkimit pingaartinneqarnerpaapput. Nunanullu allanut ministerip oqaatigaa sermeq aappat Issittumi inuunermi atukkat allanngussasut.

- Kalaallit Nunaat periarfissaqalissaaq aningaasaqarnikkut nammineernerunissamik. Nunap ilua aatsitassanik qaqutigoortunik allanillu ulikkaarpoq- tamakkulu ullumikkut Kinap kisermaassingajalluni niuerutigai, nunanut allanut ministeri oqarpoq.

- Kalaallit Nunaat puisinniarnerinnarnik, qaqqanik alianaaqisunik qilaatersornermillu inuussuteqarsinnaanngilaq. Nunarsuarmi sumi tamani inuiannit piumasarineqarput periarfissanik, ataqqineqarnermik kiffaanngissuseqarnermillu pisinnaatitaaffiit.

Tamat naalakkersueqataanerat inuussutigineqarsinnaanngilaq
- Nuummiit Rønne aqqusaarlugu Cairomut imaappoq tamat naalakkersueqataanerat kisimi aamma inuussutigineqarsinnaanani.

- Issittumi Kalaallit Nunaat Danmarkilu ataatsimut USA-mut, Canadamut, Ruslandimut Norgemullu illuatungiliuttuupput, nunanut allanut ministeri Villy Søvndal oqarpoq.

- Soorunami uagut kalaallit peqatigalugit kalaallit naalagaaffeqatigiinnerullu soqutigisaat sapinngisarput tamaat illersortussaavagut, Allingemi innuttaasut ataatsimeersuarnerani minutsini 12-ni oqalugiarnermini Villy Søvndal oqarpoq.

Powered by Labrador CMS