Inuusuttut inuuneq upperilersimavaat piumassuseqarlutillu
Ullumikkut Timi Asimi-mi inuusuttut 17-it piumassuseqarluartut kajumissuseqartullu soraarummeernissaminnut piareerput taamaalillutillu inuunertik naallugu ilinniarnissartik aallartillugu
Inuusuttut 17-it 16-iniit 18-inut ukioqartut sapaatit akunnerni 12-ni suliniut Timi Asimi naappassivaat, siunertaalluni inuusuttu "imminnut tatigillualernissaat inuunertillu tamaat ilinniarnissaminnut peqqinnermik kajumissuseqalerlutik".
Taamaallaat pingasut Timi Asimip ilungersunertumik timesorneq naammassinngilaat, suliniummi Timi Asimi Adventuremi pisortaq Kim Godtfredsen oqarpoq.
Oqaluttuarpoq suliummi pisussat qitiusunik naleraqartut. Inuttut ineriartorneq, ullut tamaasa timikkut sungiusarneq inuusuttutut nakkajaatsutut inuunissaminnut inuttut piginnaasatik piorsartuarlugit.
Timi Asimip siunertaraa inuusuttut asimi periarfissanik asimiinnermillu ilisimasaqarnerunissaat.
Kim Godtfredsen naapertorlugu ilisimatusarnerit takutippaat, tunaartaqarluarluni asimi sulisinnaanerup inuusuttut inuummarinnerulissutigisarai, inuusuttummi inooqataanissaminnut piginnaaneqarnerulersarput atuarfimmilu nuannaarnerusarlutik. Aamma inuusuttut stressinnginnerusarput nakkarsarneqannginnerusarlutik.
Suliniut inuusuttunut 15-iniit 18-inut ukiulinnut tunngatinneqarpoq, meeqqat atuarfiani ilinniarnerminnik naammassinnissimanngitsut imaluunniit unitsitsiinnarsimasut, aammali atuartut karakteriminnik pitsaanerulersitsiniartut. Suliniut Timi Asimi aqqutigalugu inuusuttut inuttut piginnaasaat nukittorsarneqartarput, taamaalillutik Nuummi Periareersarfimmi ingerlaqqissinnaallutik kingorna ilinnialerlutik, Kim Godtfredsen nassuiaavoq.
Kommuneqarfik Sermersooq namminersorlutillu oqartussat suliniummik aningaasaliisuupput.
- Aningaasatigut tapersersorneqarsimanngikkuni suliniut ingerlanneqarsinnaanngikkaluarpoq. Taamaattumik nuanneqaaq suliniut pisortaniit naalakkesuinermillu sulisuni taama ilassilluarneqartigimmat.