Nunatta nunap toqqavianut piumasaqaataa FN-imut nassiunneqarpoq

Kunngeqarfiup Danmarkip Kalaallit Nunaata kujataa nunap toqqavianik qinnuteqaataa nunat sanilitta Canadap Islandillu toqqaviiinik ilaatigut qaleriippoq

Nunatta kujataani nunap toqqavianut qallunaat-kalaallit piumasaqaataat FN-imut tunniunneqarpoq. Ass.: Leiff Josefsen

Qallunaat naalakkersuisuisa Nunatsinni Namminersorlutik Oqartussat peqatigalugit Kalaallit Nunaata kujataani - Kalaallit Nunaata sineriaanit 200 sømilit sinnerlugit ungasissusilimmut - nunap toqqavianik 115.000 kvadratkilometerimmut piumasaqaammut ilisimatuussutsikkut uppernarsaat tunniuppaat.

Imaq piumasaqaataasoq kujammut kimmut Canadap tungaanoortuuvoq kangimullu Islandip tungaanoortuulluni.

Ilisimatuussutsikkut paasissutissat Kommissionen for Kontinentalsoklens Grænser-imut (CLCS) tunniunneqarput, taamatut paasissutissiipput Nunanut allanut Ministeqarfik aamma Namminersorlutik Oqartussat.

FN-ip Imaanik piginnittussaanermut isumaqatigiissutaa 1982-imeersoq, Danmarkip 2004-mi atuutilersitaa, naapertorlugu piumasaqaat FN-p Generalsekretæria aqqutigalugu tunniunneqarpoq.

Piumasaqaammut uppernarsaammi pineqarpoq Kunngeqarfiup Danmarkip sumiiffiit piumasaqaataasa katillugit tallimaasut ilaat pingajuat.

Sumiiffiit amerlanerusut
Piumasaqaat siulleq, Savalimmiut avannaannut piumasaqaat, 2009-mi apriilimi tunniunneqarpoq. Sumiiffimmut tullermut, Savalimmiut kujataannut, piumasaqaat 2010-mi decembarimi tunniunneqarpoq.

Sumiiffinnut piumasarineqartunut kingullernut marlunnut, Kalaallit Nunaata avannaanut avannamullu kangianut, tamatumani ilanngullugu Qalasersuarmut piumasaqaammut, uppernarsaatissat suli naammassineqarsimanngillat.

Sumiiffinnut tallimanut tamanut piumasaqaatit Kommissionen for Kontinentalsoklens Grænser-imut tunniunneqarsimassapput kingusinnerpaamik 2014-imi.
Kunngeqarfik Danmarki Kalaallit Nunaata avannaanut paasissutissanik suli katersivoq.

Aggustimiit decembarimut Nunap Toqqavianik Suliniummik taaneqartoq, qallunaat, savalimmiut kalaallillu oqartussaasuinit aqunneqartoq, svenskit sikunik aserorterutaannik Oden-imik ilisimasassarsiussaaq.

Piumasaqaatit imminnut qaleriipput
Canadap Islandillu piumasaqaataat qallunaat-kalaallit kujammut kimmut aammalu kangimut piumasaqaataannut qaleriipput. Islandip piumasaqaanni 2009-mi apriilimi tunniuppaa, Canadap suli tunniutinngikkaa.

Nunarpassuarnit uppernarsaatit annertuu CLCS-imit suliarineqarnissaminnut utaqqipput, oqaatiginerlu ajornarluinnarpoq qallunaat-kalaallit piumasaqaataasa suliarinerat qaqugu aallartinneqassanersoq.

Uppernarsaatit suliarineqarnerat ukiut marluk angullugit sivisussuseqarsinnaavoq.

Piumasaqaatit Kommissionen for Kontinentalsoklens Grænser-imit suliarineqareernerisa kingorna, sumiiffit piumasarineqartut imminnut qaleriippata, illua'tungeriit namminneq tamanna isumaqatigiinniutigissavaat.

Powered by Labrador CMS