Una pissutigalugu "Norsaq" aqqutaannaani mikkallarpoq
Air Greenland ilaasuni pillugit oqaaseqarneq ajorpoq, uppernarsarpaali sisamanngormat siunertarinngisamik Islandimut mikkallarneq ilaasumik "eqqissiviitsumik" pissuteqartoq
Air Greenlandip Airbus-iani "Norsaq"-mi naalakkap sooq ullumi Islandimut mikkallarnissaminik aalajangernersoq timmisartortitseqatigiiffiup oqaaseqarfigiumavallaanngilaa.
- Timmisartorsuup naalagaa oqaluussimavata, taassumalu uppernarsarpaa ullaap tungaani Keflavikimut mikkallartariaqarsimanerminut pissutaasoq ilaasoq eqqissisimanngitsoq, ikiorneqarnissamik pisariaqartitsisoq, Pia Christensen Bang, Air Greenlandimi attaveqaatilerisoq, paasissutissiivoq.
Aamma atuaruk "Sooq "Norsaq" aqqutaani mikkallartariaqarsimava?"
- Ilaasoq Keflavikimi ambulancemik aaneqarpoq tamatumalu kingorna timmisartoq Kangerlussuarmut ingerlaqqippoq, tassani ilaasut sinneri timmisartup naalagaanit qanoq pisoqarsimaneranik oqaluttuunneqarlutik.
- Qanoq isumaqarpiarpit oqaravit ilaasoq "eqqissisimanngitsoq"? Arnallu qanoq inneranik allamillluunniit oqaluttuarsinnaavit?
- Naamik, ajoraluartumik ikioqqissinnaanngilakkit. Ilaasuvut pillugit oqaaseqarneq ajorpugut, Pia Christensen Bang oqarpoq.
Aamma atuaruk "Napparsimaneq pissutaalluni aqqutaani mikkallartoqarpoq"
Sapaatip akunnerani aqqutaannaani mikkallarnerit aappassaat
Ataasinngormat timmisartumi tassanerpiaq arnaq ilaasoq ima perulutsigilerpoq, "Norsaq"-mi naalagaq aalajangerluni mittarfimmut qaninnerpaamut mikkallarniarluni, taamaasineranilu mittarfik qaninnerpaaq tassaavoq Norgemi Bergen-imiittoq.