Kinap nunarput Danmarkimit salliutippaa

- Beijing Danmarkip tungaanut qiviaraangat Kalaallit Nunaat takulertorneqarnerusarpoq, qallunaat tusagassiutaannit oqaatigineqarpoq

Kinap Kalaallit Nunaat Danmarkimit soqutigineruaa, Politikenimi aaqqissuisuuneq Bo Lidegaard isumaqarpoq, Aajuna inuussutissarsiornermut aatsitassanullu naalakkersuisoq Ove Karl Berthelsen 2011-mi Kinamut tikeraartilluni. Foto: Paninnguaq Olsen

Politikenimi aaqqissuisuunerup Bo Lidegaardip Nuummi inunngorsimasup qularutiginngilaa Kinamiit naalakkersuinermik suliallit ingammik Kalaallit Nunaat Danmarkiunngitsorli soqutiginerusaraat.

- Beijingimiit Danmarkimut isigigaanni Kalaallit Nunaat takulertorneqarnerusarpoq, taama ullumikkut Politikenimi pingaarnertut allaaserisami allappoq.

Lidegaard isumaqarpoq Kinamiut ingammik pingasut soqutigineqarnerusartut Kalaallit Nunaat Issittorlu eqqartorneqartillugit, tassalu Nordøstpassagen (Nunarput tunoqqullugu aqqut), nunatsinni aatsitassat soorlu uulia, gas, kuulti zinkilu kiisalu aatsitassanik qaqutigoortunik taaneqartartut.

Læs også "Uffe: Rigsfællesskabet står overfor store udfordringer"

Læs også "Har Helle T. glemt Grønland?"

Kalaallit Nunaat Kinamut ima soqutiginartigaaq aatsitassaqarpat aatsitassaqanngikkaluarpalluunniit soqutiginninneranut sunniuteqalruni, Lidegaard nangilluni allappoq.

Kinap nunatsinni Danmarkimilu soqutigisai uani sapaatip akunnerani pingaarluinnalersimapput, peqqutigalugu Kinamiut præsidentiat Hu Jintao naluneqanngitsutut Danmarkimut tikeraartussaammat.

Naalakkersuisut siulittaasuat Kuupik Kleist knr.gl-imut oqarpoq, Danmarkimi ministeriunerup Helle Thorning-Schmidtip Hu Jintaomik ataatsimeeqateqarnerani nunarput eqqartorneqartariaangnitsoq Kleist nammineq ataatsimiinnermi peqataatinnagu.

TV2 News'imi nunanut allanut politikkeqarnermi aallakaatitami "Ellemann Lykketoftimi" nunanut allanut ministeriusimasoq Uffe Ellemann-Jensen sapaatiummat oqarpoq, Kinap Kalaallit Nunaannik soqutigisaqarneratigut naalagaaffeqatigiinneq nutaarluinnarmik annertunermillu pingaaruteqalersimasoq.

Powered by Labrador CMS