Eqqaamiut: Bendt Frederiksenip eqqaaneqarnera ataqqinartuuli
Inatsisartut siulittaasorisimasaat aalisartoq piniartorlu toqukkut qimaguppoq
Angut nukittooq, ataatsimoortitsilluarsinnaasoq nunaqqatiminullu uummateqarluni sullissiumatooq tassanngaannartumik toqukkut qimaguppoq. Nunatta angutitaasa ataqqinartut ilagilluinnarpaat sulinermini nunaqqatimi ajunnginnerpaamik atugaqarnissaat angujumallugu sullissisilluarsimasoq aammalu tunniusimasoq akornatsinniikkunnaarpoq.
Inatsisartut siulittaasuunermini pingaartilluinarsimavaa Inatsisartut ataatsimiinnerini partiit arlaannaalluunniit salliutinnagit naligiimmik isummersorsinnaanissaat angujumallugu aqutsinissaq, tamannalu Bent Frederiksenip ataqqinaatigaa angisooq. Inatsisartut siulittaasuatut sulinermini imarsuartulli anorersuarsiorfiugaluartumi sikorsuarmitulli manitsigisumik eqqissinartumut saatitsisinnaanera maluginiarneqartuarsimavoq.
Bent Frederiksen, tassaavoq angut aalisarnermik piniarnermillu inuussutissarsiuteqarnermini sikorsuaq imarsuarlu angallavigalugu inuusoq aammalu ippassaq sikumi uppippoq.
Uanga sulininni tunuliaqutserluartarsimavaanga tuppalliutigisartagarisaqisannik. Kinguaariit nikinnerini assigiinngitsunik atugassaqaraluarluta partiitta iluani assigiimmik ataqatigiittumillu anersaaqarluta suleqatigiinnitsinni nukittuunngortitsisumik ingerlateqqinnissamik annertuumik uannut aqqutissiuussisimanera ingerlateqqinneqassaaq suli amerlanerusunut iluaqutigineqaqqullugu.
Bent Frederiksenip nulia Marianne, qitornai ilaqutaalu tamaasa qamannga pisumik misiginneqatigigaarpavut eqqaarsaatitsinnilu nukittorsaaqataaniarluta tunuliaqutaanerput matumuuna apuupparput.
Qujavugut nunaqqatigisimagatsigu aammalu qujaqaagut suleqatigisimagatsigu.
Nunatsinnut ernerulluartoq Bent Frederiksenip eqqaaneqarnera ataqqinartuuli.
Siumut sinnerlugu
Siulittaasoq Aleqa Hammond