”Meeqqamiit meeqqamut” Kalaallit Nunaanni meeqqat taperserpai

Ilinniarfimmi atuartut ilaatigut North Side Festivalimi sulinermikkut aningaasanik katersipput.

Kalaallit Nunaanni meeqqat inuunermi atugarliortut aningaasat atortullu Meeqqamiit meeqqamut suliniuteqarnerani katersorneqartut iluaqutigissavaat. Annertunerusumik oqaatigalugu meeqqat pingasuniit 17-inut ukiullit Nuummi Meeqqat Inuusuttullu Illuanni Mælkebøttenimiittut.

Mælkebøtten, pisortamit Kirsten Ørgaardimit aqunneqartoq, Nuummi meeqqat sumiginnagaasut atugaasa pitsanngorsarnissaannik sumiginnaaqqinnissammillu pinaveersimatitsinermik suliaqarpoq.

Mælkebøtten nutaaliorluni sammisaqarfiuvoq meeqqanullu qimarnguiulluni, siunertaavorlu meeqqat inuusuttullu sumiginnagaasut pitsaanerusumik allanngoranngitsumillu inuuneqalernissaannut ikiornerisigut inuttut atugarisatigut aamma tarnip pissusaatigut kingornuttakkat ajortut suliaqarfiit suleqatigiinnerisigut qaangertinneqarnissaat.

- Meeqqamiit meeqqamut-mit suliutigineqarfigineqarnerput nuannaarutigingaarparput. Attorteqaagullu Danmarkimi inuusuttut kalaallit meeqqat ulluinnarni inuunerat ajornanngunnerulersinniarlugu namminneq piumassutsimminnik tiimini taamatut amerlatigisuni sulillutik suliniuteqarmata, pisortaq Kirsten Ørgaard oqarpoq.

Isiginnaartitsisarnermik ilinniartitsisoq Kramer Madsenip Århusimi Tunisassiornermut Ilinniarfimmeersup Meeqqamiit meeqqamut pillugu aallarnisaasuusup ataqatigiissaarisuusullu tikkuarpaa Kalaallit Nunaanni Mælkebøttenimilu meeqqat tapersernissaannik toqqaanerminni immikkut pissuteqarlutik.

- Taamaaliorpugut ajoqimmat takullugu Kalaallit Nunaanni meeqqat inuttut atukkatigut atugarliortut pissaaleqillutik inuummata. Mælkebøttenilu aqqutigalugu tapersiinissarput qinerparput Kirsten Ørgaard ambassadøriulluarmat. Ajasoorpunga kalaallit meeqqat sullinnissaannut inuunermi atornissaa qinermiga. Tassunga Kalaallit Nunaanni aasaanerani tikeraarnerinnaanngilaq, suliamullu tunniusimalluinnarpoq. Inullu suliamut tunniusimasoq naapikkaanni allatut oqartoqarsinnaanngilaq, taanna taperserneqartariaqarpoq. Meeqqat taamatut ikiuinerput iluaqutigingaassavaat, Kramer Madsen nassuiaavoq.

North Side Festivalimi sulisut

Ilimagaa tunisassiornermut ilinniarfimmi ilinniartut Kalaallit Nunaanni meeqqanut 70.000-80.000 kr.-it katersussagaat, taakkulu ilaatigut pinnguartarfimmut nutaamut aamma meeqqanut juullimi inuuissiornerannilu tunissutinut atorneqassapput.

Aningaasat ilaatigut pissarsiarineqarput tunisassiornermut ilinniarfimmi ilinniartut North Side Festivalimi Aarhusimi sapaatip akunnerata naanerani 15.-17-junimi ingerlanneqartussami ikiortitut sulinerisigut. Aasap ingerlanerani kingusinnerusukkut, sapaatitakunnerisa 27-anni, ilinniartut ilaatigut Tivoli Friheden-imi aaqqissuinermikkut aningaasanik katersiniaqqissapput, tassani ilinniarfimmi isiginnaartitsisartut isiginnaartitsassallutik. Isiginnaartitsinemut ilinniartut aamma upernaaq tamaat piumassutsiminnik sulinermikkut Tivoli Friheden-imi maskottiunikuupput.

-Aningaasalli taakku sunik tamanik allanngortitsisinnaanngillat. Taamaattumik kattuffiit suliffeqarfiillu tassani peqataarusuttut pissarsiariniarniarpagut. Taamaammat pinngussanik tunisassiortartoq ataaseq isumaqaruni pinnguartarfitsik Kalaallit Nunaanniissasoq, attaveqarnissamut akunnermiliussinnaavugut, Kramer Madsen erseqqissaavoq.

Ukiut tallimassaat Meeqqamiit meeqqamut nunani allani inuunikkut atugarliortunut aningaasanik katersuivoq.

Siorna Kirgisistanimi meeqqat aqqusinermi inuusut, ukiullu taassuma siuliani Afghanistanimi meeqqanut cirkusimik ilinniarfik suliniaqatigiiffiup taperserpai.

- Nuannerluinnarpoq inuusuttut, immaqa isumaqartut piginnaasaqarpiaratik, meeqqanik imminnit atugarliornerusunik ikiuiniarlutik sulerusummata. Sulineq nuannertarpoq assersuutigalugu Afghanistanimi meeqqat atortussaannik containerimik immiigaangatta. Taamaliornikkut inuusuttut takulluarsinnaalertarpaat iliuuseqarneq allaassuteqartorujussuusinnaasoq, Kramer Madsen erseqqissaavoq.

Illoqarfimmi borgmesterip Jakob Bundsgaardip Meeqqamiit meeqqamut tapersersorpaa. Siusinnerusukkut borgmesteriunikoq Nicolai Wammen taarserlugu suliniaqatigiiffimmut ambassadøriunissamut akuersinikuuvoq.