Kim Kielsen Sellafieldimut tikeraarpoq

Nunat Avannarliit Siunnersuisoqatigiiffiata Avatangiisinut Nunallu pissarititaanut ataatsimiititaliaaneersut Kim Kielsen, Alfheidur Ingadottir aamma Jan Lindholm Tuluit Nunaata avannaata-kangiani Sellafieldimi atomimik nukissiorfik pillugu ataatsimeersuarnermut peqataaqqammerput.

Atomi pillugu sillimaniarneq ukiuni arlalinni Nunat Avannarliit Siunnersuisoqatigiivisa suliaannut ilaasimavoq. Pingaartumik Tuluit Nunaanni Sellafieldimi atoqqiinermut nukissiuuteqarfiit kiisalu Barentsip ilaani akuutissanik qinngornernik ulorianartunik akulinnik eqqaaneq malinnaavigineqarsimavoq. Aarleqqutigineqarsimasoq, sulilu aarleqqutigineqartoq tassaavoq Atlantikup avannarliup imartaata Kalaallit Nunaannit, Islandimit, Savalimmiunit pingaartumillu Norgep kitaata sinerissamut qanittuanit nerisassanik pissarsiffiusartup aningaasaqarnermullu pingaaruteqartup mingutsinneqarnissaa.

Nunat Avannarliit Siunnersuisoqatigiiffiata Avatangiisinut Nunallu pissarititaanut ataatsimiititaliaata aaqqissuussaanik 2012-imi majip aallartinnerani tusarniaaneranut uiggiullugu ataatsimiititaliap ilaasortai pingasut Sellafieldimut angalanermut peqataapput. Nukissiorfimmi sillimaniarnikkut pitsanngorsaanernut tunngatillugu angusat ajunngilluinnarput, atomimilli nukissiorfimmit eqqagassanik toqqorsisarnermik ajornartorsiutit suli annertuumik ernumanartoqartinneqarput, Kim Kielsen ilisimatitsivoq.

- Ukiuni kingullerni Sellafieldimi sillimaniarnikkut pitsanngoriaataasimasut amerlasuut nersornartippakka. Kisiannili oqartariaqarpunga atomip nukinganik atoqqitassanik katersiniarneq suli ulorianartorsiortitsisoq, taamaattumillu toqqorterinermi aaqqiissutinik qularnaatsunik nassaarniarlutik kikkut tamarmik tamaviaartariaqarput, taamak oqarpoq Alfheidur Ingadottir, Islandimi Venstregrøninut ilaasortaq.

Taassuma ilaasortaqataa Jan Lindholm, Sverigemi Miljøpartimeersoq isumaqataavoq: Atomimit eqqakkanik atoqqitassanik katersineq avatangiisinut inunnullu suli annertuallaamik ulorianaateqarpoq, taamaattuassallunilu. Atoqqitassanik katersinermik periutsimik qularnaatsumik ungasissoq isigalugu suli nassaartoqanngilaq. Sverigep aamma Finlandip, tamarmik atomimik nukissiorfillit, tamanna nassuerutigaat. UK aamma taamatut iliuuseqarnissaanik kajumissaarpara, Sellafieldimut angalareernerup kingorna taamak oqarpoq.

Kalaallit Nunaanni Siumumeersoq Kim Kielsen ilassuteqarpoq: Fukushimami Japanimiittumi ajunaarnersuaqarneranit ukioq ataaseq sinnerlugu qaangiuppoq, nunarsuarput tamatumani eqqaasinneqarpoq atomip nukinga tamakkiisumik aqunneqarsinnaanngitsoq. Suliffeqarfimmi Sellafieldmiittumi inuit aamma kukkuluttorsinnaanerat pisinnaavoq. Sellafieldimi pinngortitap piliaanik ajunaarnersuaqarneratigut qinngornernik aniasoqarneratigut inuit Sellafieldimit ungasissumi Norgemi, Kalaallit Nunaanni Islandimilu najugaqartut inuuniarnerat sunnerneqarsinnaavoq.