Qitornakka tullianik ilaassapput

Kunngissap nulia Mary ullaap tungaani Hotel Arcticimit anivoq, akunnittarfiup neriniartarfiani kangerlummut qimuttunullu isikkiveqarluni ullaakkorsioreerluni.

Maanna Danmarkimut uterpoq angalaqataasut peqatigalugit, ilaatigut Lego-mik piginnittoq Kjeld Kirk Christiansen, taannalu kunngeqarfimmi angutit pisuujunerpaat ilagaat, Legos fond-ilu aqqutigalugu Maryp meeqqanik qinngasaarneqartartunik suliniutaanik tapiissuteqartoq..

Misigisarpassuit
Mary nunatsinniinnermini misigisarpassuaqarpoq tunissutisisarlunilu, ilaatigut ippassaq unnukkut Qaasuitsup Kommuniata borgmesterianit Jess Svanemit tassimik tunineqarpoq ingerlaannaq atisaminik.

- Kusanaq! Nuannaarutigeqaara, Mary oqarpoq.

Mary aamma Ilulissani nammineernerusumik pisiniarfilerivoq - assiliisunit malitseqarani. Angalaqatit ilagalugit The GlacierShop-imi pisiniarpoq.

Illoqarfimmiinnermini akunnittarfiup inaani pitsaanerpaami najugaqarpoq, suitemi pisuunut naatsorsuussami Ilulissat Kangerluannut isikkivigissuarmi. Altanimit kangerluk assilisarsinnaavaa.

Aamma atuaruk "Nuannisarluinnarpoq"

Aamma atuaruk "Mary: Kikkut tamaasa ilasserusuppakka"

Akunnittarfiup avataani pisortatigoortumik tikeraarnermini arlalissuarnik sammisaqartarluni, Hotel Arcticimi qasuersaartarsinnaasimavoq persuarsiunngitsumillu iliuuseqarsinnaalluni. Taamaasilluni nunat allamiut tikeraat arlallit paasinngisaannarsimavaat inuk atuagassiani sapaatip akunneranut saqqummersartuni assilineqarnerpaasartut ilaat akunnerminniissimasoq.

Ullaaq manna Sermitsiaq.AG-p misigaa Mary tikeraat allat ilagalugit neriniartarfimmi ullaakkorsiortoq. Meterialunnguit ungasissusilimmi aappariit nunat allamiut issiapput, taakkualu Mary hofdame-alu qissiminngilaalluunniit.

Tamanna sumiiffinni amerlanngeqisuni Maryp misigisarpaa.

Hotel Arcticimi tulluusimaarput
- Sulisut sulilluartorujussuusimapput tulluusimaarutigeqaarpullu suut tamarmik taama ingerlalluartigimmata, akunnittarfiup pisortaa Erik Bjerregaard oqarpoq.

Mary tikeraarnermini meerarpassuarnik ilaqarpoq, siullermiik nunaqarfimmi Saqqaami ippassarlu Ilulissani. Qularnanngitsumik qitornani eqqarsaatigisimassavai.

- Oqaloqatigiissutigisimavarput qitornavut soorunami aamma Kalaallit Nunaannut ilaajumaartut. Tamanna qilanaarisorujussuuvara, Mary oqarpoq.

Aamma atuaruk "Meeqqat, ingerlaqqittariaqarpunga"

Aamma atuaruk "Mary, utaqqisimavatsigit"

Kalaallit Nunaat uummammioraa
Sermitsiaq.AG-mit aperineqarami aasaq manna tikeraarnermini misigisaq suna annerpaasimanersoq, ippassaq akivoq:

- Tamanna tamatigut akiuminaattarpoq. Sorpassuaqarsimaqaaq. Qinngasaarisarnerup unitsitsiniaanerup paasititsiniaassutiginera qanoq ingerlallluartigisoq misigalugu pissanganarsimaqaaq naammagisimaarnaqalunilu. Nuanneqaaq takullugu tamanna qanoq meeqqanut iluaqutaasimatigisoq.

Qaqugu Mary Frederillu peqatigiillutik Nunatsinnut uteqqissanersut ilisimaneqanngilaq. Sivisuvallaarunanngilarli.

- Kalaallit Nunaat uima, kunngissap, tamatigut immikkut uummammiorisarsimavaa. Uangattaarlu aamma tikeraarninnit siullermiilli, Mary oqarpoq.