Kiassarnerup akia 50 procentimik qaffassaaq
Qaammat ataasiunngitsorluunniit ilimasaaruteqarluni inissianik ingerlatsiviup INI-p nunami tamarmi attartortunut tamanut kiassarnermut aki qaffappaa
INI-mi attartortorpassuit qularnanngitsumik ulluni makkunani tuparujussuartinneqassapput, inissianik ingerlatsivimmit allagarsigunik.
Tamanna pissaaq pissutigalugu INI-p kiassarnermut akiliutit juulip aallaqqaataanit atuuttumik allanngortissammagit, tamatumalu kinguneranik ineqarnermut akilutaagallartartoq 50 procentimik qaffassaaq.
Tamatuma saniatigut INI-p ilimasaarutigaa immikkut akiligassaqartoqarsinnaasoq, 2013-imi apriilimi ukiumut atugaq tamarmiusoq naatsorsorneqarpat.
- Sooq? Naatsumik oqaatigalugu kiassarnermut akiliutaagallartartup annertussusia atugassatullu naatsorsuutigisaq oqimaaqatigiissammata, ini.gl allappoq.
- Kialuunniit saneqqutaarsinnaanngilaa ukioq issippat nukissaq atorneqartoq annertusissasoq - uuliallu akia qaffariartortoq. Aamma ininik INI-mit ingerlanneqartunik attartortut. Tamatuma saniatigut kiassaateqarfiit naammaginartumik aserfallatsaalinerat akeqarpoq.
- INI-p akisussaaffigaa Nukissiorfiit/uuliamik pilersuisut attartortullu ataasiakkaat akornanni akiligassat eqqortumik ingerlanneqarnissaat. Siunissami akiliutaagallartut annertussusaa ukiup affakkaartumik iluarsisarneqarsinnaavoq, INI nalunaarpoq.