Kujataani kiffartuussinissamik isumaqatigiissut annilaanngatigaat

- Maannakkorpiaq Naalakkersuisut Kujataani angallassineq pillugu kiffartuussinissamik isumaqatiginninniarput, tamannalu ingerlanneqarpoq kommuni soqutigisaqaqatigiilluunniit tusarniaavigeqqaarnagit

- Periuseq tupinnarluinnarpoq, kommunit soqutigisaqaqatigiillu tusarniaavigineqarsimanngimmata.

Taama oqaaseqarpoq Kalistat Lund Kommune Kujallermi Angallannermut ataatsimiititaliaq sinnerlugu oqaallisissiami massumani tamakkerlugu saqqummiussatsinni oqarpoq:

Kiffartuussinissamik isumaqatigiissutissat ilisimalersimasagut malillugit, Kujataata ineriartornissamut periarfissai isumakulunnartoqaqaat.

Naalakkersuisut kissaatit piumasaqaatillu tamaasa sumiginnarpaat, nunap immikkoortuata kissaatigalugillu piumasaqaatiginnaasai, aamma malunnaqaaq, Kommune Kujalleq Qeqertarsuup Tunuani aaqqiissutissap ingiassagaa, taavani ukiup annersaani angallammik angalanissamut periarfissatuaasoq.

Periarfissat ajornerit
Tamannali atorsinnaanngilaq nunap immikkoortuani sikorsuaqartartumi. Taamatut aaqqiinerup nassatarissavaa nunap immikkoortortatta ineriartortinnissaanut periarfissat ajorseriarnissaat. Inuussutissarsiortut assartukkanik ajornartorsiuteqalissapput aamma akisuumik sivisuumillu assartuinermit eqqorneqassapput. Ilaasut Narsarsuarmi timmisartumut anngutinngitsoortassapput aamma heliportit helistoppisut annikillillugit atorneqalernissaat ernumanaateqarpoq. Angallannerulli iluani kiffartuussinerit ajorseriaqqinnissaat Kujataata naammagiinnarsinnaangilai.

Paarlattuanik angallannerup ineriartornissaa pitsanngoriaateqarnissaalu pisariaqartinneqarput, taamaalillutik inuussutissarsiuteqartut aningaasaleerusussuseqalissammata aamma aatsitassarsiornerup takornariaqarnerullu iluani siuariaallatsisinnaassalluta.

Kiffartuussinissamik isumaqatigiissutissani pingaaqrtinneqarsimanngilaq S61-t atorunnaarnerisigut sussaqannginnermik malitseqarnissaa, aamma sivikitsumik atuuttussanik kiffartuussinissamik isumaqatigiissutit siunniunneqarmata, angallassisartut atortunut nutaanut aningaasaleerusussuseqassanngillat, assersuutigalugu helikopterinut. Aamma inuit toqqissisimanissaat navianartorsiortinneqaratarsinnaavoq, SAR-ik upalungaarsimanissap ajornerulernissaa naatsorsuutigineqarmat.

Maanna oqartariaqalerpugut naammaleqaaq, innuttaasut inuussutissarsiuteqartullu peqatigalugit piumasarissavarput angallannerup ineriartortinneqarnissaa, naammattunik inissaqarneq tikinneqallattaarnerlu eqqarsaatigalugit, nunap immikkoortuata iluani nunami namminermi nunanullu allanut ingerlaqqittarnissat eqqarsaatigalugit.

Angallassineq akeqarpoq
Piffissanngorpoq Nunatsinni nuna tamakkerlugu politikerit paasitinneqarnissaat angallannerup akeqarneranik aamma aningaasaliinnarneqarsinnaanngitsoq atuisut akiliuteqarnerulernerannit. Ukiorpassuanngortuni kiffartuussinissamik isumaqatigiissutit akinik iluarsiivigineqarsimanngillat, eqqarsaatigineqanngilarli Danmarkimi inuttoqisumi DSB qimutsuitsuusisarnermut annertuumik tapiiffigineqartarmat.

Maanna Angallannermut ataatsimiititaliap kaammattuutigaa, nunap immikkoortuani ataatsimoorluta piumasarissagipput pitsanngoriaateqarnissaq minnerpaamillu kiffartuussinissamik isumaqatigiissutinut makku piumasaqaatigerusullugit:

• Minnerpaatut illoqarfiit Qaqortoq, Narsaq aamma Nanortalik ukioq kaajallallugu timmisartuussivigineqartarnissaat,
• Qulakkeerneqassasoq naammattunik inissaqarnissaq Narsarsuami ingerlaqqittarnissanut kiisalu qulakkeerneqassasoq angallassisartut akornanni ataqatigiissaarinissaq aamma angallassisartut akornanni pisariaqartunik naammattunik inissaqartitsinissaq.
• SAR sillimanissaq ingerlalluartoq pisariaqartinneqartup sakkortusarneqarnissaa
• Nanortalimmut tunngatillugu aamma nunaqarfiit kujalliunerusut kiffartuuneqarnerinut tunngatillugu kiffartuussinerup ersarissumik pitsanngoriartinneqarnissaa, helikopterinut inissat annertusarlugit, angallammik angallassisarnermik taperneqarsinnaasut
• Kiffartuussinissamik isumaqatigiissutinut aningaasaliissutaasartut akitigut iluarsiivigineqartarnissaat
• Sivisuumik atuuttussanik kiffartuussinissamik isumaqatigiissusiortoqartassasoq, angallassisartut aningaasaleerusussuseqalersillugit.

Naggataagut Angallannermut ataatsimiititaliap erseqqissaatigerusuppaa, Kommune Kujalliup marloqiusamik angallanneq kissaatigippagu, imaatigut angallassineq timmisartuusinermut ilapittuutaanissaa. Naggataarutaasumik Kalistat Lund oqaaseqarpoq: -Maanna ataatsimoorluta sorsuutigissavarput angallannermi kiffartuuneqarnitta pitsanngoriaateqarnissaa, Nuummi atasinnaanngitsumik sivikitsuinnarmillu aaqqiissutissamik qulaatinnarluta aalajangiisoqassanngitsoq