- Uppernanngingajappoq
Qeqertarsuarmi lottomik eqquisut suli paaserpianngilaat 7,8 million koruuninik amerlanernik pissaqalerlutik
Lottop allagartaa 50 koruunilik imminut akilersinnaalluarpoq Larsine aamma Jakob Storchip Qeqertarsuarni Pilersuisumi tallimanngornermi pisiarigamikku neriuutigaat arfininngornermi lottomi annerpaamik eqquissallutik. Maanna 7.8 million koruuninik amerlanernik peqarnerulerput.
Larsine TelePostimi eqqiaasuuvoq unnukkut klubimi ikiortitut sulisarluni uia Jakob meeqqerivimmi iggavimmi ikiortaalluni.
- Lottomik millionærinngornerput uppernanngingajappoq. Suli iluamik paasinngilarput. Pilersuisuliarpugut koponi eqquisimanersoq paasiniarlugu oqarfigineqarluta annerpaamik eqquisimasugut. Kisianni angerlarluta tekst-tv'ikkut kisitsisit takoqqittariaqarlutigit ilumoornersut paasiniarlugit. Ajunngillat, Larsine Storch oqarpoq.
Aappariit nunaqarfimmit Kangerlummi kingoqqisuusut Qeqertarsuarnut nuunnerupput sisamanik qitornaqartut, suufami eqqissillutik inuunissartik naatsorsuutiginngilaat. Illuatungaanilli.
- Millionerpassuit ulluinnatsinnik allanngortitsingaarnavianngillat, suliffigut suliffigiinnassavagut nuannareqigatsigik. Unnuarli sininngitsuungajappugut aningaasarpassuit eqqarsarnarnermik kisianni aalajangerpugut illusiniarluta aamma umiatsisarsiniarluta, Larsine Storch oqarpoq.