Saliinersuaq
Inimi attartortut ineqarnermut akiliut ataaseq eqqorsinnaavaat saleeqataanermikkut
Ini aqqutigalugu ineqartut saliinerat ullumikkut ingerlanneqarpoq. Ineqartut puussiarsualisaarlutik aaqqaserlutillu eqqakkanik katersipput. Tamanna illoqarfinni arlalinni ullumi juunip aappaani ingerlanneqarpoq.
Silaginnera eqqorluarneqarpoq, INI-milu sulisut saliisunut alakkarterillutik angalaarput, assiliillattaarlutillu.
Ukiut tamaasa iluatsilluartumik Saliineq-mik ingerlatsisarput raatiup qaqqaani najugallit. Raatiup qaqqaanilu najugallit saliinissaq ullaaq manna aallarnerpaat ullaakkorsioqatigiinnermik.
Fritz Gedionsen Nuummi najugaqarnermini peqataaqqaarpoq. - Saliineq aaqqissuunneqaraangat illoqarfinni allani najugaqartilluta
peqataajuartarpugut. Ilulissani Qasigiannguanilu peqataasareernikuuvugut. Nuanneqaaq avatangiiseq eqqarisaq kusassarlugu saleeqataalluni, Fritz Gedionsen oqaluttuarpoq.
Aamma Flavia Poulsen blok 17-mi najugalik saleersuaarpoq. - Uiga sulilluni soraaqqammerpoq, malissagunarpaangalu. Kisianni eqqatsinni
salitassaqaqaaq. Oqimaannerilli unitsiinnartarpakka, tamakkua nukittunerit isumagiumaarpaat. Kisianni eqqarisarput kusatsikkiartulersoq isigalugu nuanneqaaq, Flavia Poulsen ulapeqisoq taama oqarpoq.
Peqataasut Saliineq 2012-mi pinnatassaqarput. Arlaat ineqarnermut akiliummik eqqugassaqarpoq, aammalu meeqqat immikkut eqqugassaqartinneqarlutik.