Mianersorlusi - nanoqarpoq
Nuup Akiani nanoqarneranik nutaarsiassaq arfininngornermi kikkunnik tamanik avalatsitsivoq. Assit isiginnaakkit - mannalumi sila
Ullaap tungaani atuarlugu (arfininngornermi aaqq) Nuup eqqaani nannumik takusoqarsimasoq pissangaammerpunga, uumasorsuaq nujuartaq alutornartorlu Kalaallit Nunaannut tikinnerma kingorna kalaaliaqqami taamaallaat takusimagakku.
Toke Brødsgaard taama allappoq, arfininngornermi Akiani misigisalikkersaarumminik Sermitsiaq.AG'imut nassitsisimasoq.
- Iluatsitsilluavippunga. Maani Nuummi ikinngutima ilaasa kingusinnerulaartukkut sianerfigaannga, takuniaallunga ilaarusunnersunga - taakkua ikinngutimik ilaannit sianerfigineqarsimammata nanoq takutsiarsimallugu.
- Qangali umiatsiameereerpugut Qaquullu tungaanut aallarluta tamaani nanoq takuneqarsimammat. Oqaluttuunneqarpugut puisimik pisaqarsimalluni qeqertap tungaanut ingerlasoq, pisanigooq nerisimagaa. Qeqertamut apuukkatta umiatsiat 20't missaanniilereerput allallu aggiallutik. Nal. ak. 2,5 missaanni tamaaniikkatta umiatsiat ataatsimoortut 46'iupput allat nikittaallutik, tamaammat ullup ingerlanerani umiatsiarpassuit aqqusaarsimassapput.
Nanoq takusinnaanngeriaratsigu aalajangerpugut qeqertaq kaajallanniarlugu, allamit takusinnaanerlugu paasiniarlugu.
Angutitsiarsuit saqqoqanngitsut
- Qeqertap kangiata tungaanit angutit inuusuttut pingasut arpallutik qummukarput, nannumik isiginnaarfissamik nasiffissarsiorlutik. Umiatsiamit isiginnaarpagut ernummatigalugit, ilami sakkoqanngillat qeqertami ilorparterlutik arpakkamik, naak nanoq sumiippiarnersoq ilisimaneqanngikkaluartoq.
Nuup eqqaani nannumik assit takukkit
- Kiinnaasa pissusilersornerat takusinnaavagut tikkuartornerannillu paasinarpoq nanoq takugaat. Qeqertap avannaanut ingerlavugut nanoq takusinnaalerlugu. Nanoq tamaani ersarissorujussuarmi illernartaaqqami nallarfissarsivoq sinngusalerlunilu. Sukkut tamaana qummut qiviartarpoq. Ataasiarluni pissutigalugu timmisartuaqqap atsippallaartumik qulaalluni timmineranit.
Nanoq peqqippasissoq
- Nanorsuarmik taamak kusanartigisumik isiginnaarsinnaarnissamut periarfissaqarneq nuannersorujussuuvoq, sumiiffipput eqqarsaatigissagaanni nanoq kusanaqaaq peqqippaseqaluni. Kissaappara avannamut aqqutissani nassaarissagaa illoqarfissuit allat qanilleqqinnagit, tamakkunani inunnit ulorianartorsiortinneqassammat.
- Igalaannit takusinnaavara umiatsiat 10-12 nannumik suli malinnaasut maanna Akia sinerlugu avannamut ingerlarusaarput taamaattumik naatsorsuutigaara, nannup qeqertaq qimassimassagaa, avannamut naluttoq imaluunniit ingerlaarusaartoq. Neriuppunga taanna takoqqissanagu, Toke Brødsgaard oqaluttuarpoq.