Minik Dahl Høegh nersornaaserneqartoq
Danmarkimi Spillerforeningip ukioq manna danskit 1. divisionianni arsaattartutut Minik Dahl Høegh toqqarpaat
Minik Dahl Høegh, arfininngornermi unnukkut AG København aamma Bjerringbro-Silkeborgip DM finalit aappassaanni unamminerisa nikinneranni, isiginnaartut 10.000 saavanni 1. divisionimi ukiup arsaattartuatut nersornaaserneqassaaq.
Nersornaasiineq Spillerforeningip ukiumi unammiuaarfiup naammassineranut atatillugu ingerlataraa. Danmarki assammik arsartartut ittannerit akornanni namminneq toqqaasarput aamma kina toqqarneqassanersoq aalajangertarlugu. Tallimassaanik 1. divisionimi arsaattartumik toqqaasoqassaaq. Peqatigiiffimmut ilaasortat tamarmik taasisinnaapput aamma nunani allani najugallit. Taasinerit assigiiaarnerat tupinnaannarpoq: Minik Dahl Høegh, tullersortigisaminit pingasoriaammik amerlanernit taagorneqarpoq.
Minik Dahl Høeghimik toqqaaneq pissusissamisoorluinnartoq HC Fynimi ukioq unammilluarsimaqaaq klubbialli maanna akiliisinnaajunaarnikuuvoq.
- Tulluussimaarutigeqaara innersuussaasimanera maannakkut Herningilialeriarama pokali angalaartoq tigujartorlugu tanngassimaaqaanga. Soorunami taama kaammattuusigaanera siunissami sunniuteqassaaq, Minik Dahl Høegh Sermitsiaq.AG'imut oqarpoq, nangillunilup
- Taama pisoqartillugu piffissanngortarpoq kingumut qivialaarluni eqqarsarlunilu. Kingusilaartukkut assammik arsarneq aallartippara, taava aatsaat sungiusaasup Søren Hildebrandtip 2004'mi U18 landsholdinut ilanngutsimanga, arlaannik susoqalerpoq. Kingusinnerusukkut Søren Hildebrandt qujanartumik sungiusaasoreqqinnikuuara, Fredericia Håndbold ukioq ataaseq peqataaffigigakku. Ukiumi unammiuaarfimmi naammassisumi Jakob Larsen HC Fynimi sungiusaasuutigaluni arsaqataanera, suli ineriartoqqinninnut pissutaavoq. Eqqarsartaatsitsigut aammali taktikkimik ingerlatsinigut immikkuullarilluinnarput. Aamma eqqarsaatigaara Jakob Larsenip siulliulluni GOG'mut piseqqaarmanga
Minik pilluarit aamma Kalaallit Nunaanni arsartartut pilluaritsi!