Mittarfeqarfiit pisortaa nutaaq

Ingerlatsivik nutaamik pisortartaarpoq aningaasarsiornermik ingerlatsilluarsinnaasumik taannaavoq Jens Lauridsen, Jens B. Frederiksen oqarpoq

Jens Lauridsen, Mittarfeqarfiit pisortartaavat. Assi: Mittarfeqarfiit

Naalakkersuisut Mittarfeqarfiit pisortassaattut Jens Lauridsen juunip allaqqaataani atorfinitsippaat.

Jens Lauridsen 39'nik ukioqarpoq, Viborgimi Samson Agromi pisortaanertut atorfeqarluni. Tamatuma siorna Danfoss sinnerlugu Mexico, Slovakiet aamma Italiami pisortatut atorfiit assigiinngitsut atuuffigai.

Jens Lauridsen nunani tamalaani pisortatut atorfeqartarnerminit aamma ingerlatsivinnik aningaasarsiorneq aallaavigalugu ingerlanneqarnissaannik misilittagai Mittarfeqarfinnit tassarpiaapput atorfissaqartinneqartut, ineqarnermut, attaveqarnermut angallannermullu naalakkersuisoq Jens B. Frederiksen oqarpoq nangillunilu:

- Atorfinitsitsinissamik ataatsimiisitaliamik pilersitsinikuuvugut qulakkeerniarlugu Mittarfeqarfiit pisortassaannik toqqaanissami naleqqunnarnerpaamik toqqaasoqarnissaa. Nuannaarutigaarput Jens Lauridsen nassaarigatsigu, taassuma misilittagai suliffeqarfinnillu ineriartortitseqqinnissamik ingerlatsinissaa isumarput naapertorlugu Mittarfeqarfinnut aamma inuiaqatigiinnut tamarmut iluaqqutaanissaa neriuutigaarput.

Niels Grosen pisortanngorniat akornanniinngilaq
Jens B. Frederiksenip Mittarfeqarfinni sulisut kikkulluunniit tamaasa, ukioq januaarimi Niels Kreutzmannip tassanngaannartumik toqukkut qimagunnerata kingorna annertuumik suliniarnerannik qujassuteqarfigai, taakkununnga ilanngullugu Mittarfeqarfinni ingerlatsinermik pisortaaneq Niels Grosen, pisortaanissatut qinnuteqartunut ilaanngitsoq, taamaattorli pisortartaarnissap tungaanut pisortaanertut atuussinnaalluni neqeroorutigisimallugu.

- Nuannaarutigaara ingerlatsivimmik allanngortitsinissarsuarmut ingerlatsisussamik inuk eqqortoq toqqaratsigu, taamaaliornikkut Mittarfeqarfiit Angallanneq pillugu siunnersuisoqatigiit innersuussutaasut ineriartortinneqaqqissammat, tamassuma piviusunngortinnissaa kissaatigaarput, Jens B. Frederiksen oqarpoq.

Powered by Labrador CMS