Kunuunnguaq nunatsinni serminut neriuuteqalersitsisoq
Ilisimatusaammi nutaami ilaatigut Knud Rasmussenip assilisaanik tunngaveqartumi Kalaallit Nunaanni sermit - sila allanngorpat - qangatut ilissaqqaarnerat takutinneqarpoq
Kalaallit Nunaanni sermit isumannanngillat, silalu nillertippat qangatut imaaliallaannaq ilisinnaallutik. Tamanna Københavns Universitetimi ilisimatusaammi ilaatigut Knud Rasmussenip arfineq-aappassaanik Avanersuarmut ilisimasassarsiorneranit assilisanik tunngaveqartumi takutinneqarpoq.
- Inerniliussat tassaapput sermit isumannanngitsut silalu 1940-kkut kingorna piffissap ilaanisut nillerteqqippat iluarseqqilertorsinnaasut, ph.d.-mik ilisimatusartoq suliniummullu pingaarnertut tunuliaqutaasut ilaat, Anders Bjørk Københavns Universitetimi Naturhistorisk Museumimi Grundforskningscenter for GeoGenetikimeersoq.
Ilisimatusaat paasisaqarfiusutut oqaatigineqarpoq, sermit ukiut 80-it ingerlaneranni qanoq ineriartorsimanerannut aatsaavissuaq takussutissaqartoqalermat.
Suli ernummatissaqarpoq
Knud Rasmussenip 1930-kkunni timmisartumit assilisarpassui aamma iluaqutaasorujussuusimapput, Kalaallit Nunaata sineriaata nunap assiliorneqarneranut atorneqarsimagamik.
Taamaattorli Kalaallit Nunaanni sermit eqqarsaatigalugit suli ernummatissaqarpoq, ilisimatusarnermi aqutsisoq Kurt H. Kjær, Anders Bjørk peqatigalugu suliamut tunuliaqutaasoq, oqarpoq.
- Kalaallit Nunaanni kiatsikkaluttuinnarpat sermit aakkiartornerannik annertuumik ajornartorsiuteqalernissarput qularutigineqassanngilaq, oqarpoq.
Ilisimatusarnermi paasisat pillugit annerusumik atuarsinnaavutit atuagassiami Nature Geosciencemi uani.
Aamma assit amerlanerit uani takukkit.