Odensemi umiarsualivimmi festivali
Ukioq manna aammaarluni Kalaallit Nunaannit peqataalluartoqarpoq Odense Havnekulturfestival ingerlanneqarmat
Havnekulturfestivali ukiut tamaasa aaqqissuunneqartarpoq, taanna siullermik 2006 aaqqissuunneqartoq maajimi sapaatip akunnerata naanera kingulleq aaqqissuunneqartarpoq.
Ullut pingasut ingerlaneranni aaqqissuussinerit assigiinngitsut ingerlanneqartarput. Nipilersortoqarpoq, nerisassaqarluni, eqqumiitsuliat timersorneq allarpassuillu immap eqqaani ingerlanneqarlutik.
Pisarneq naapertorlugu Kalaallit Illuutaat aaqqissuusseqataavoq. Perngaamik Havnekulturfestivali Byens Ø'mi aaqqissuunneqarpoq tamaani Nordatlantiske Hus aappaagu atorneqarsinnaanngortussaq inissisimasussaavoq. Nunat avannaamiut suleqatigiinnerat Odensep umiarsualiaviani aallartereerput, islandimiut, savalimmiormiut aamma kalaallit eqqumiitsuliortut assassortartullu suleqatigiillutik tupersuarmi saqqummersitseqatigiimmata.
Nivi Nielsen arfininngornermi ualikkut nuannerluinnartumik tusarnaartitsivoq. Nammineq erinniani atorpai ataaserli Ole Kristiansenimit erinniarineqartoq aamma atorlugu. Belgiamiut marluk nipilersoqatigai Seraphie Strangier aamma Tim Vandenbergh. Tusarnaariat ersaattaannerannit tusaaneqarsinnaavoq tusarnaartitsineq naammagisimaarneqarluartoq.
Tusarnaartitsineq naammassitsiartoq Nivi Københavnimut tuaviinnaq aallarpoq tassannga Frankfurtiliassalluni. Nivi Nielsenip tullissaanik tusartitsiffigissavaa Tysklandip kujataani nipilersornermik festivali.
Kalaallinik soqutigisallit kalaallit kulturiannik eqqumiitsuliaannillu naammattorsuarmik takusassinneqarput. Eqqumiitsuliortut sulianik ingerlatsisut takussaapput. Kalaallit Nunaat pillugu allaaserisat aammalu nerisassat usserneqarsinnaasut neqeroorutaapput soorlulu Nordatlantiske Hus atulersussaq pillugu paasissutissat takuneqarsinnaallutik.
Rasmus Lyberth sapaammi ualikkut qiperukkaminik saqqummersitsiutigaluni nipilersorlunilu erinarsorpoq.
Kalaallit Illuutaat Nivi Nielsenip tusarnaartitsinissaanut NAPAmit aamma Odense Musikudvalg tapiiffigineqarpoq, ullunilu pingasuni festivalip ingerlanneqarnerani inuit 60't namminneq kajumissutsiminnik ikiuupput.
Havnekulturfestivalimik aaqqissuisut naatsorsuutigaat inuit 25.000 aqqusaartut Danmarkimilu aasarissuaq 25'nik kiattoq assigiinngitsunik sammisassaqartitsisoq nuannisarfigeqalugu.