Qinikkatut ukiut 25 sulisoq

Josef Motzfeldtip Inatsisartunut siullerpaamik qinigaanerminit ukiut 25-inngornerat ulloq 26. maj 2012-mi nalliussisinnaavaa

Ullumi maajip 26'anni Josef Motzfeldt ukiuni 25'ni politikkimik sulinermini nalliuttorsiorpoq.

Inatsisartut siulittaasuat Josef Motzfeldt qinikkatut ukiunik 25-liissaaq, taamaalillunilu tassa namminersornerusimanerup ilarujussua maannalu namminersulersimanerput tamaat Inatsisartunut ilaasortaaffigisimallugit.

Inatsisartut allattoqarfianni tusagassiivinnut taama nalunaaruteqarput.

Josef Motzfeldt siullermik 1987-imi qinigaavoq, taamanikkut Inuit Ataqatigiit sinnerlugit Kujataata qinersivigisaani qinigaalluni. Taamanikkut Inatsisartunut ilaasortat 27-it tikillugit qinigaasinnaapput, tassa qinersivinni qinikkat 23-it ilassutitullu qinikkat sisamat.

1987-imi qinersinermi Inuit Ataqatigiit sinnerlugit Inatsisartunut ilaasortaatitat pingasuniit sisamanut amerleriarput. 1987-imi qinersinerup kingorna Siumup Inuit Ataqatigiillu nutaamik naalakkersuisuutitaqalermata Josef Motzfeldt Niuernermut, Angallannermut Inuussutissarsiutinullu ilinniartitaanernut naalakkersuisunngortitaavoq. Naalakkersuisooqatigiinnerli ulloq 8. juni 1988 ajalusoorpoq Siumullu kisimiilluni naalakkersuisuutitaqalerluni. Josef Motzfeldtip ukiuni 25-ini qinikkatut atuussimaneranut ilaavortaaq piffissami 1988-imi marsimiit 1991-imi marsiumut Inatsisartunit sulinngiffeqarmat Inatsisartunullu 5. marts 1991 qinersinermi Inatsisartunut qinigaaqqilluni.

Josef Motzfeldt taamaatuttaaq Nuummi kommunalbestyrelsimut ilaasortaavoq piffissami 1989-imiit 1993-imut.

1994 Josef Motzfeldt Inuit Ataqatigiinnut siulittaasunngorpoq ukiunilu 13-ini tulliuttuni siulittaasuulluni. Josef Motzfeldt partiimut siulittaasuunermini partiimini naammaginartumik kinguariit parlaannissaat qularnaarniarlugu timitalimmik suliniuteqarsimavoq 2007-imilu maajimi partiip ataatsimeersuarnerani siulittaasutut tunuarluni siuttuunerup nukinnut inuusunnerusunut tunniunneqarnissaa siunertaralugu.

Inatsisartuni ukiut ingerlanerini Josef Motzfeldt ataatsimiititaliarpassuarni ilaasortaaffeqartarsimavoq, soorlu Aningaasaqarnermut Ataatsimiititaliami, Nunanut allanut Sillimaniarnermullu Ataatsimiititaliami, Kukkunersiuinermut Ataatsimiititaliami, Akileraartarnermut Akitsuusiisarnermullu Ataatsimiititaliami, Avatangiisinut Ataatsimiititaliami, Kultureqarnermut Ilinniartitaanermullu Ataatsimiititaliami, Nunalerinermut Ataatsimiititaliami, Nunat Avannarliit Killiit Siunnersuisoqatigiiffianni, Nunat Avannarlllit Siunnersuisoqatigiiffianni, taamatullu aamma Naalagaaffit Peqatigiit ataatsimeersuarnerannut aallartitatut soorlu aamma Josef Motzfeldt Atortussiassat aatsitassanit pisut pillugit Siunnersuisoqatigiinni kiisalu aningaasaateqarfimmi Nunafondenimi aamma issiasimasoq. Josef Motzfeldt taamatuttaaq ataatsimiititaliarpassuit ilaasortaaffigisami ilarpassuinut siulittaasuusarsimavoq, taamaalilluni ukiuni 25-ini ilaasortaanermini inuiaqatigiinni pisut annertuumik paasisimasaqarfigilerlugillu ilisimasaqarfigilersimallugit.

1999-imi Josef Motzfeldt Aningaasaqarnermut Niuernermullu Naalakkersuisunngoqqippoq 2007-illu tungaanut naalakkersuisuniilluni 2002-miit 2003-mut piffissap ilaa eqqaassanngikkaanni.

Piffissami 2003-miit 2007-imut Josef Motzfeldt Aningaasaqarnermut Nunanullu allanut Naalakkersuisuuvoq peqatigitillugulu Nunat avannarliit suleqatigiinnerannut aamma ministeriulluni. Akileraartarnermut, aningaasaqarnermut nunanullu allanut tunngasunut suliassaqarfiit oqimaatsut taakku ataatsimoortillugit naalakkersuinikkut isumagineqarnerisa saniatigut piffissami tassani aamma Josef Motzfeldt naalakkersuinikkut aqqutissiuisuuvoq nunatta nunanut allanut tunngatillugu naalakkersuinikkut ingerlatsinerata nutaarluinnarmik sinaakkusersorneqarnerani.

Piffissami 2003-miit 2007-imut Josef Motzfeldtip naalakkersuisunut ilaasortaaffigisaani Tunngaviusumik inatsisini killiliussarititaasut iluanni nunatta nunanut allanut tunngasutigut naalakkersuinikkut ingerlatsinermi periarfissai naqissuserneqarput, atortuulersinneqarlutillu Namminersorlerullutik Oqartussat danskillu naalagaaffiata akornanni aalajangersimasunik isumaqatigiissuteqartoqartarneratigut. Tamatumani minnerunngitsumik nunatta illersorneqarnissaanik Danmarkip USA-llu 1951-imi isumaqatigiissutaata nutarterneqarnissaa pilugu Igalikumi isumaqatigiissut nutaaliornermut aqqutissiuussisuuvoq, nunatta, Danmarkip USA-llu isumaqatigiissutaannut nunarput siullerpaamik atsioqataatinneqarmat.

Josef Motzfeldt piffissami tamatumanerpiaq aamma nunanut allanut tunngatillugu immikkut noqangasumik suliniarnermik aallartitsivoq, tassunga ilaalluni nunanut nunasiaasimasunut OLT-nut siulittaasuunermik isumaginninneq. Nunanut allanut tunngasutigut naalakkersuinikkut suliassaqarfimmi suliniarnerminut peqatigitillugu Aningaasaqarnermut Naalakkersuisutut inuiaqatigiit kalaallit aaqqissuussaanerannik iluarsaaqqinnernik nutarterinernillu annertuunik aallartitsivoq aningaasaqarniarnerlu nunatta siunissaanut namminersornerusumut naleqqussarlugu, ataatsimoortumik tapiissutit inuiaqatigiit aningaasaqarniarnerannut aalajangiisuulluinnartaraluarnerata aamma annikillisinneqarneratigut.

Josef Motzfeldt Namminersornerullutik Oqartussat Namminersorlutillu Oqartussat sinnerlugit naalakkersuinikkut suliaqarnermi saniatigut Skandinaviami, Savalimmiuni Islandimilu nipilersornerup, eqqumiitsuliornerup atuakkiornerulllu iluani aamma annertuumik attaveqaateqarpoq ulluinnarni naalakkersuinikkut sulineranut aamma isumassarsisitsisartunik.

Powered by Labrador CMS