Nuuk ajunaarnersuaqartillugu kalerrisaarut appittoq
Nuummi nilliasaassuaq arfininngornermi ullaassakkut marloriarluni appippoq. Politiit niviarsiaqqat marluk qalerrisaarutip eqqaani takuneqarsimasut oqaloqatigerusuppaat
Nuummi politiit niviarsissat marluk oqaloqatigerusuppaat Nukissiorfiit inaani qattunersami ajunaarnersuaqartillugu kalerrisaarutip eqqaani takuneqarsimasut.
Kalerrisaarut assaannarmik appisinneqarsinnaasoq tassa matuersaataa peeriarlugu toortagaq toorlugu aatsaat aallartinneqarsinnaasoq arfininngornermi ullaassakkut marloriarluni appisinneqarpoq.
Taamma Nuummi politiit Sermitsiaq.AG'mut ilisimatitsipput.
Kalerrisaarineq siulleq arfininngorninngoraa ullaassakkut sisamat qeqqata missaanni Nuummi tamanit tusaaneqarsinnaavoq. Aappassaanik nilliasaassuaq sisamat eqqaanni appippoq. Sikaavik ammarneqarsimavoq politiilli suli ilisimanngilaat sikaavik ammaannarsimanersoq taamaalilluni kikkunnit tamanit assaq pulatiinnarlugu aallartinneqarsinnaalluni - imaluunniit inuit kalerrisaarummik appisitsisut matuersaateqarfianik aserortereqqaarsimanersut.
- Qatserisartut aamma politiit kalerrinneqartillugit tusindilikkaanik naleqartarpoq. Taamaattumik nivissat marluk sikaaviup eqqaani takuneqarsimasut oqaloqatigerusuppagut. Nivissat marluk takuneqarsimapput taakkuallu oqaloqatigerusuppagut arlaannik takusaqarsimanersut imaluunniit taakkuunersut ajunaarnersuaqartillugu kalerrisaarummik appisitsisimanersut. Paaserusuttorujussuuarput taakkua qattorngup qaavani sulerisimanersut. Sulimi nalugatsigit, Nuummi politiini pigaartut ittuat ilisimatitsivoq.
Nivissat marluk qattunermi sikaaviup nilliasaatip aallartittarfiata eqqaani takuneqarsimasut ujarneqarput - taakkua 12-13 missaannik ukioqassangatinneqarput. Aappaa naatsunik qernertunik nujaqarpoq tunguusamik kavaajaqarluni qernertunillu qarleqarluni. Aappa takisuunik nujaqarpoq taartumik kavaajaqarluni qernertunillu qarleqarluni.
- Ajunaarnersuaqartillugu ikiuuttussat katersornissaat akisoorujussuuvoq. Tamatuma saniatigut inuit arlallit ernumatinneqarput. Taamaattumik pisoq ilungersunartutut isigaarput, Nuummi politiini pigaartoq oqarpoq.
Arlaannik ilisimasaqaruit takusaqarsimallutilluunniit politiinut iluaqqutaasinnaasumik, taava qinnuigineqarputit Nuummi politiit 32 14 48 atorlugu ilisimateqqullugit.