Kasper ”Qavak” Svendsen sumiinnersoq nalunngiliuk?

Ilulissani politiit ujaaraat Kasper Svendsen aamma taaneqartartoq ”Qavak”. Taanna arfininngormat unnukkut kingullermik takuneqarpoq

Ilulissani politiit ujaaraat 42-nik ukiulik Kasper Svendsen, aamma taaneqartartoq ”Qavak”. Taanna arfininngormat unnuakkut kingullermik takuneqarpoq. Assi: Privat

Kasper Svendsen, aamma taaneqartartoq ”Qavak” maanna Ilulissani politiinit ujaarineqalerpoq, taanna kingullermik takuneqarpoq Ilulissani imerniartarfiup ”Falkereden” silataani arfininngornermi unnukkut nal. 20 missaanni.

Kalaaliuvoq 42'nik ukiulik 180 centimeterit missaannik takissusilik nerinnappoq qaamangajattunik naatsunik nujaqarpoq atugarai koorput qarlii tungujortut taartut imaluunniit qernertut, fleece tujuuluk qasertoq aamma timersortartut kamippai qasertut, allamik naamik.

Kasper Svendsen Qeqertarsuarni angerlarsimaffeqarpoq maannali Ilulissani aalisarluni.

Politiit Kasperimik takunnissimasinnaasunit attavigineqarusupput, inuit taassuminnga Ilulissani allamilluuunniit arfininngornermi nal. 20 kingorna takunnissimasinnaasunit attavigineqarusupput.

Tamatuma saniatigut Kasper Svendsenip imerniartarfimmi "Tuukkaq"-mi nal. 18 missaani arnat marluk ilagisai politiinit oqaloqatigerusunneqarput.

Ilulissani politiit attavigineqarsinnaapput oqarasuaatit ukua atorlugit 94 32 22 aamma 54 38 22.


Powered by Labrador CMS