Siumut Alcoa tapersersorlugu naqissuserpaa

Upernaakkut ataatsimiinnermi aatsitassarsiorluni suliassaqarfiit annertuut soorlu Alcoap Maniitsumi aluminiumimik aatsitsiviliornisaanut aamma Isukasiani savimminissamik piiaavissaq pillugu oqallisigineqarneranni Siumumi avissaartuneq erserpoq.

Taama nittartakkatsinni sapaatip akunnerata siuliani allaaserisaqarpugut. Kisianni Siumumi avissaartuuttoqanngilaq.

Partiip aqutsisui siulittaasoq Aleqa Hammond, politikkikkut oqaaseqartartoq Per Berthelsen aamma Inatsisartuni Siumup gruppiata siulittaasua Hans Enoksen tusagassiutinut allapput partiimi avissaartuuttoqanngitsoq.

Aaqqissuisoqarfimmut nassiussaat ima nipeqarpoq; Piffissami kingullermi ingerlatassat annertuut pillugit ingammik Maniitsup eqqaani Alcoap aluminiumik aatsitsivissamik pilersaarutaanut tunngatillugu tusagaassiutit kikkunnut tamanut “Siumut avissaartuuppoq”-mik isumaqalersitsiniarsaralutik ulappupput.

Atagu uteqqittariaarullugu nipituumik manna avammut suaarutigitigu: ”Siumup Alcoa pillugu suliniut tamakkiisumik tapersersorpaa”, tamannalu nunatsinni innuttaasut Maniitsormiullu oqariartuutigisaannut naapertuulluinnarpoq.

Avissaartuuttut allarluinnaapput, tassa Naalakkersuisut taakkulu pingaarnertut tunuliaqutaat.

Avissaartuunneq saqitsaannerlu taanna pineqartumi Naalakkersuisunut ilaasortap tassumalu Naalakkersuisoqarfiata neriorsuutigisimasartik eqqortillugu pineqartoq pillugu ”Inatsisartunut ilaasortanik isumasioqatigiissitsisimagaluarunik” aammalu avatangiisiminnut tunngatillugu avammut ammanerusumik suli pisimagaluarpata pinngitsoortinneqarsinnaasimassagaluarpoq.

Siumut 100%-ersorluni ajornanngippallu suli aallussinerulluni sulerusuppoq, taamaalilluni tapersersuineq taanna suliniutip iluatsittumik pilersinneqarluni piviusunngortinneqarneranut siaruaassinnaaqqullugu.

"Tamakkiivissumik tapersersuineq" - suli naamik

Tamatumalu Siumup sapinngisani tamaat atorlugu pilersaarutit piviusunngortinnissaannut peqataaniarnera kinguneraa.

Taamaattoq pissutsit arlallit Siumup paasisaqarfigerusutani suli akissutissaqartinngilai, taamaammallu massakkuugallartoq pilersaarutigineqartumut atatillugu tamakkiisumik isumaqataanini taamaallaat erseqqissumik nalunaarutigisinnaallugu.

Ajuusaarnaraluaqisumik tusagassiutit suliap immikkuualuttortai suli Inatsisartuni Naalakkersuisunilu oqallisigineqarnatillu aalajangiivigineqanngitsut kisiisa sammivaat. Tamatumalu politikerit ataasiakkaat sammineqartut suli pisortatigoortumik saqqummiunneqannginneri pissutigalugit suleqatigisamik pituttuiffiusumik aalajangernissaannut suli periarfissaqalinngitsut oqaaseqarfiginissaannut ussernartumut nakkaassimanerannik kinguneqarpoq.

Tamannalu pissutigalugu Siumut partiitut saqqummiunneqartunut tunngatillugu tunuarsimaarpoq, taamaaliornerimmi isumaqatiginninniarnernut pingaaruteqartunut aalajangiiniarnermut atatillugu oqallinnermut sunniutilinnut akornusiilluarsinnaammata. Isumaqatiginninniarnernik suliaqartillugu eqaatsumik suleriarsinaaneq pisariaqartarpoq pisariaqartuaannartarlunilu, tamakkumi ”niueqatigiinnermi” periutsinik tunngaveqartuaannartuusarmata.

Siumulli inatsisitigut sinaakkutinik nunami atuuttunik tunngaviusumik aallaaveqartarnera assortugassaanngilaq. Taakkunanngalu sanguallannerit soorunami aaqqiissusiinissat isumaqatigiissuteqarnissallu anguniarlugit katersuiffiusinnaasut angujumallugit isumaqatiginninniutigineqartariaqarumaarput. Tamatumali pinissaata tungaanut isumaqatiginninniarnissami periarfissat aaqqinneqarsinnaanngitsumik innarlerumanagit uivernata politikikkut aalajangiunneqartussatut sammisassatut saqqummiunneqarumaartussanut utaqqigallarta, Aleqa Hammond, Per Berthelsen aamma Hans Enoksen allapput.