Ane: Tamaattumik qaleralinniarneq aaqqissuuteqqinneqarpoq
Politikkikkut akisussaasup Ane Hansenip sinerissap qanittuani qaleralinniarnermi allanngortiterisoqarnera illersorpaa, KNAPK'p siulittaasuanit Leif Fontainemit isornartorsiorneqareernarmi kingorna
Akissuteqaammi ammasumi Ane Hansenip tupigusuutiginerarpaa aaqqissuusseqqinnerup ukiuni arlaqalersuni sulissutigineqareersup KNAPK-mit – suliaq aallartimmalli qanimut suleqataasumit – kinguartinniarneqarnera. Paasissutissanik KNAPK-p amigarneraanera tunuartillugu akissummini allappoq tusarniaanerit, nalunaarusiat, paasititsiniaanerillu aatsaat taama annertutigisut ingerlanneqartut annikippallaartutut taassappagit tupinnartoq.
Nangilluni Ane Hansen allappoq pisassiissutinik pigisassat KNAPK-p nikingassuteqarpallaarnerarlugit uparuartugai Namminersorlutik Oqartussat nalunaarutaat nr. 2, 2. februar 2012-imeersoq naapertorlugu maannakkut pilersaarutaareersut nalunaarutigineqareersullu malillugit iluarsaanneqartut.
Pisassiissutinik pigisassat naammassillugit nalunaarutigineqassapput pilersaarutit ilisimatitsissutaareersut naapertorlugit, tassalu ullup 1. juli 2012-p kinguninnguatigut.
Naggataatigut Aalisarnermut Naalakkersuisup akissummini ammasumi KNAPK-p siulittaasua eqqunngitsumik oqarnerarpaa pasilliimmat qaleralinniareersuunngitsut sinerissap qanittuani qaleralinnialernissaat periarfissiuunneqartoq.
Tunngavilersuinerminilu issuarpaa nalunaarummi 2. februar 2012-imeersumi §10-mi allassimasoq aalisartut ukiuni kingullerni pingasuni pisaat aallaavigalugit pisassanik pigisassaat naatsorsorneqassasut. Tassa aalisartut qaleralinniareersut kisimik pisassinneqarsinnaasut Ane Hansenip naqissuserpaa.