Frimærkenit tunisanit Nakuusa tapersersorneqarpoq
Post Greenlandip frimærkinit tunisanit 50 ørit meeqqat inuussuttulllu atugarissaarnissaannut pisinnaatitaaffiinullu ingerlateqqittarpai
Frimærki ” Unicef/Nakuusa” 8 kr.-mik nalilik pisiarineqaraangat 50 øre meeqqat inuusuttullu pisinnaatitaaffiinut nukittorsaaniartumut, Nakuusamut, nakkartassaaq.
Ukiullu marluk qaangiuppata tunisinermi isertitat naatsorsorneqassapput, tassinilu aatsaat Nakuusamut nakkartussat tunissutigineqartussaallutik.
Allan Pertti Frandsen, frimærkilerinermi Post Greenlandimi ingerlatsisoq ilisimatitsivoq siornatigut tunnissutigineqartarsimasut 100.000 kr.-nik amerlassuseqartarsimasut kisianni neriorsuerusunngilaq taamatut amerlatigisunik tunnissuteqaqqissinnaallutik.
- Nunarsuarmi frimærkinik katersisartut ukiuni kingullerni ikiliartorsimapput, taakkuusarlutillu isertitatigut malunnartitsisarnerpaat. 2014-mut utaqqissaagut aningaasanik tunnissuteqarnissatsinnut, neriuppugulli amerlaumaartut, taamak frimærkinik aqutsisoq erseqqissaavoq.
Nakuusap, ukiuni tallimani Unicef Danmarkillu Namminersorlutik Oqartussallu akornanni ingerlanneqartussaq, nalunngilaa aningaasat qanoq atorneqassanersut pigunikkit.
- Suliniutinik paasiniaassutissanillu ukiuni Nakuusap atuuffiani ingerlatsiinnaavittussaavugut, taamaattumik tunissutigineqarsinnaasut tamaasa qujalluta tigussuagut. Ukioq manna suliniutitsinni sammissuarput angajoqqaat akisussaaffiat. 2014-mi suna sammissanerlutigu isumaqarpunga siusippallaartoq oqaaseqarfiginissaanut, kisianni aningaasat atorluarneqarumaarnissaat qularnaatsuuvoq, taama qularnaveeqqusiivoq Nakuusami sulisoq Klaus Møller.
Camilla Nielsenip frimærki titartarsimavaa Dorit Olsenillu ilioqqaasuusimalluni.