D: Akikitsunik sulisoqarneq akilernerluinerunngilaq
Michael Rosing isumaqarpoq nunanit allanit suliartortitat akissaatikitsut akuerisariaqarivut Maniitsup eqqaani aluminiummimik aatsitsivissamut atatillugu
Demokraatit sinnerlugit Inatsisartunut ilaasortaq Michael Rosing aaqqissuisoqarfimmut oqallisissiaq una nassiuppaa, paatsoorneqarsinnaaqqunagu tamakkerlugu ilanngupparput:
"Alcoap Maniitsumi aluminiumik aatsitsiviliorniarnerminut piumasaraa aatsitsivissap sanaartornerata nalaani sulisut akikitsut nunanit allaneersut (qularnanngitsumik kinameersut) sulisorineqassasut. Tassa imaappoq aluminiumik aatsitsivimmik sanatitsiniarutta, taannalu inerpat ingerlaneranut maani najugaqavissut 650-t sulilersinniarutsigit taava aatsitsivissap sanaartornerata nalaani sulisut akikitsut nunanit allaneersut sulisorineqarnissaat akuerisariaqarparput. Oqallinneq piviusunik tunngaveqarpat oqalilluarnerussagaluarpugut, tassa oqalliseqataasugut tamatta piviusoq taanna toqqammavigigaluarutsigu.
Suliniutinik angisoorsuarnik Alcoa-mut tunngasutut ittunik piviusunnngortitsiniarneq Demokraatit isaannit isigalugu nunatta aningaasatigut imminut napatittunngornissaata tungaanut ineriartortinneranut iluaqutaassagaluarpoq. Alcoa suliffippassuarnik pilersitsinermigut nunatsinni inuiaqatigiit tamarmiusut aningaasaqarniarnerannut ajunngitsumik sunniuteqassagaluarpoq, tamatumalu malitsigisaanik isumaginninnikkut aningaasatuutinik annikillisitsissagaluarluni. Tamakkua saniatigut akileraarutitigut isertitat qaffariaateqarnerat takusinnaalissagaluarparput nalinginnaasumik inuiaqatigiinni aningaasatigut kaaviiaartitsinermut qaffariartitsissalluni. Tamanna ajunngitsuuvoq, tapersersornarlunilu.
Taamaallaat sanaartornerup nalaani
Kalaallit-nunaanni suliat tamarmik kalaallit aningaasarsiaat tunngavigalugit akissarsiaqartitsinissaq Demokraatit pissusissamisoortutut isigaat. Tamatumunngalu ilutigitillugu ilisimasariaqarpoq taamatut isumaqarnermi suliffeqarferujussuarmut naaggaartariaqalersinnaaneq, naak tamatuma ukiorpassuarni najugaqavissuusugut suliffissaqarnissatsinnik qulakkerinnissutissagaluaraatigut.
Demokraatit matumani isumaat erseqqilluinnarpoq; isumaqarpugut suliniutinik angisoorsuarnik piviusunngortitsiniarnermi sanaartornerup nalaani sulisut akikitsut nunanit allaneersut sulisorineqarnissaat akornutissaqanngitsoq. Kisiannili uvagut nammineerluta inatsisiliornitsigut qulakkeertariaqarparput sulisussat nunanit allaneersut uvagut sulisartutta atugassaanik ajornerusunik atugaqannginnissaat. Tassa imaappoq sulinermi avatangiisunut piumasaqaatit assigiit, isummamik ersersitsisinnaanneq angerlartitaanermik kinguneqartinneqanngitsunut pisinnaatitaaffiit assigiit, suninerni inissaritinneqartut assigiit, ataatsimut oqaatigalugu sulisut kalaaliusut pisinnaatitaaffiisa assinginik pisinnaagtitaaffeqarneq. Kiisalu tamakkua tungaasigut nunat tamat isumaqatigiissutaasa malinneqarnissaat uvagut pingaartipparput.
Ingerlatsinissamulli tunngatillugu assortuussutissartaqanngilaq. Matumani siunniunneqassaaq suliffissat sulisunik najugaqavissunik sulisoqassasut. Oqanngilagut suliffissat tamarmik aallaqaataaniilli najugaqavissunik inuttalerneqarsinnaasut – tassanimi apeqqutaassammat suliassanut ataasiakkaanut piumasaqaatit qanoq ittuussanersut – kisiannili tamanna siunneqarnikuuvoq. Tamakkualu saniatigut tamatigut nunatsinni suliffinni taamaattuni sulisartut isumaqatigiissutaat malinneqassapput.
Akilernerluinerunngilaq
Nunanit allamiunik akikitsunik sulisoqarnissamut akerliusuniit arlaleriartumik oqaatigineqartarpoq, tamanna akilernerluinertut isigisariaqartoq. Taamatut oqarnermut Demokraatit isumaqataanngillat.
Uvagut isumaqanngilagut sulisoq Kina-meersoq Kina-mi sulinissaraluaminut naleqqiullugu pingasoriaam-mik annertutigisumik akissarsiaqarluni sulippat akilernerluinerusoq, apeqqutaatinnagu nunatsinni aningaasarsianit minnerungaatsiaraluarpalluunniit. Tasami Kina-mi aningaasat pisissutissatut nalingat allarluinnaavoq, tassami sulisoq Kina-mioq Kalaallit-nunaanni sulilernermini Kina-mi sulinerminiit aningaasarsiaqarnerusussaavoq. Demokraatit isaannit isigalugu tamanna akilernerluinerunngilaq.